Ҳамма кутаётган Роналду ва Месси тўқнашуви бўлмаслиги мумкин

Саудия Арабистонида Riyadh Season Cup турнирига АҚШнинг “Интер Майами” клуби таклиф этилган. Лионель Месси ўйнаётган жамоа Риёд шаҳрида 29 январь куни “Ал-Ҳилол” ва 1 февраль куни “Ан-Наср” билан куч синашиши режалаштирилган.

Кўпчиликни Месси ва Криштиану Роналдунинг яна бир бирига қарши тўп тепиши қизиқтирмоқда. Ўтган йили Роналду саудияликлар таркибида ПСЖ билан бўлган баҳсда Мессига қарши ўйнагани кўплаб мухлису мутахассислар эътиборини тортганди.

Бу гал кутилмаган ҳолат юз берди. Arab Sports нашрининг хабар беришича, Роналду “Интер Майами”га қарши майдонга тушмаслиги мумкин. Криштиануни жароҳат олгани айтиляпти. Қолаверса, португалиялик юлдузнинг Хитойда ташкил қилинадиган турнеда ҳам қатнашиши сўроқ остида турибди.

Месси ва Роналду узоқ йиллар давомида футбол оламида бир бири билан рақобатлашиб келган. Ҳозиргача қайси футболчи ҳақиқатан энг кучлиси экани борасида мунозаралар давом этиб келмоқда.