Ҳақиқатни гапирсанг, истеъфога чиқасан!

"Манчестер Сити" бош мураббийи Хосеп Гвардиолага клуб жуда кўплаб қоидаларни чеклаб ўтгани ҳақида нима дейсиз, деб савол беришганида, испаниялик мутахассис шундай жавоб қайтарганди:

"Мен раҳбариятга ишонаман. Агарда улар мени алдашаётганини билиб қолсам, шу ондаёқ жамоани тарк этаман". 

Доимо клуб ёмон натижалар қайд этишни бошласа, мураббий бунга важ қилиб кўрсатилади. Шу билан бирга, муваффақиятга эришса ҳам, жамоа устози ардоқланади. Аслида ҳар бир клубнинг яхши ва ёмон натижалар қайд этишида "юқоридагилар"нинг ўзига яраша ҳиссаси бўлади, ҳатто "Манчестер Сити"да ҳам. 

Бир неча кун олдин Хави матбуот анжуманида айни пайтдаги "Барселона" "Реал"дек жамоаларга қарши рақобатлаша олмаслиги ва иқтисодий ҳолат ҳали ҳам ёмон эканлигини айтди. Бу эса Жоан Лапортага ёқмаган. Шу сабабли, у "Альмерия"га қарши ўйинга ташриф буюрмади. Ҳозир клуб ичида бош мураббийни қўллаб қувватлайдиган деярли ҳеч ким қолмади. Лапорта Хавини олиб қолишга ҳаракат қилганида ҳам, раҳбариятдагиларнинг кўпчилиги собиқ клуб афсонасини бўшатиш вариантини маъқул кўришган. Эрнандеснинг энг катта душманларидан бири бу Деку. 

Деку сўнгги йилларда клубнинг эски трансфер сиёсатини йўлга қўймоқчи, яъни Бразилиядан иқтидорларни топиб келиш. Гарчи, мураббий буни қўллаб-қувватламаса ҳам, улар Витор Рокени сотиб олишди. Камига бу трансфер бонуслари билан 60 миллион еврога тушган (40+20). Ҳужумчи эса келганидан бери 327 дақиқа майдонда ҳаракат қилди. Бу жами 3 та ўйиндан кўпроқ дегани. Албатта бундан ҳам жаҳли чиққан португал уни кетишини истайди ва ўз сиёсатига қарши чиқмайдиган мураббий топишга ҳаракат қилади. 

Ҳар трансферлар ойнаси очилиши билан сиз ҳам каталонияликлар молияавий ҳолатини яхшилаш учун қайсидир футболчисидан қутулмоқчи эканлиги борасидаги миш-мишларга кўзингиз тушади. Бундан Френки де Йонг, Рональд Араухо ва Рафинья каби футболчилар чарчашгани аниқ. Шунчаки, уларни клубга бўлган муҳаббат ушлаб турибди. Аслини олганда, "Барса" бу ўйинчилар кетишни истаса, олиб қолишга ҳаракат ҳам қилиб ўтирмайди. Молявий ҳолатни ёмонлиги бор гап, буни йиллар давомида тўғрилай олмай, баттар ҳолатга олиб келаётган раҳбарият энди ҳақиқатни айтгани учун Хавини истеъфога чиқармоқчи. 

Катта эҳтимол билан, "Барса"нинг кейинги бош мураббийи кучли мутахассис ёки, номдорроқ инсон бўлмайди. Бу ёшлар жамоасида ишлаётган Рафа Маркес бўлади. Сабаби оддий, у раҳбариятга умуман қарши чиқмайдиган, ҳақиқатни аймайтдиган ва фақатгина футболчиларни майдондаги ҳаракатларига жавоб бераман, дейдиган мураббийдир.