Ўзбекистон муҳим тўқнашувда Португалияни енга оладими?

Россиялик машҳур футбол шарҳловчиси Георгий Черданцев жаҳон чемпионати доирасидаги Ўзбекистон терма жамоасининг навбатдаги рақиби — Португалияга қарши учрашув олдидан ўз фикрлари билан ўртоқлашди. 

-Ҳолатга холис қарайдиган бўлсак, Ўзбекистоннинг имкониятлари деярли йўқ. Айниқса, Португалия терма жамоаси тушиб қолган вазиятни инобатга олсак бу яққол намоён бўлади.

Ҳозир бутун дунёдаги мухлисларнинг эътибори битта саволга қаратилган: Роналду ўз ихтиёри билан захирада қолишга рози бўладими-йўқми? 

Биз тушунамизки, бу ерда бош мураббий Роберто Мартинеснинг таъсири деярли сезилмайди. Шу боис жуда қизиқ савол ўртага чиқяпти: Роналдунинг атрофида унга майдондаги ўрнини бошқаларга бўшатиб бериши кераклигини тушунтира оладиган одам топиладими-йўқми?

Ўзбекистон жуда кучли, етакчи терма жамоага қарши ўйнайди, таркибида Чемпионлар Лигасини ютган футболчилар бор ва уларга фақат ғалаба керак. 

Ўзбекистон терма жамоасининг асосий вазифаси — майдонда ўзини муносиб кўрсатиш. Ҳозирги шароит Ўзбекистон учун жуда ноқулай: улар гуруҳдаги илк учрашувда қимматли очколарни йўқотиб бўлган бош фаворитга қарши тушиб қолди.

Португалия энди мағлубиятга йўл қўя олмайди, чунки бу катта омадсизлик ва обрўга жиддий доғ бўлади, ундан қутулиш осон эмас. Шунинг учун Ўзбекистон бу ўйинга жиддий тайёргарлик кўради, бироқ дуранг ёки ғалаба қайд этиш имконияти амалда йўқ. 

Колумбияга қарши учрашувда бўлгани каби, ўз ўйинини кўрсатиш ва ишонч билан ҳаракат қилиш керак, — дея таъкидлади Георгий Черданцев.

Эслатиб ўтамиз, Ўзбекистон терма жамоасининг мусобақадаги дебют учрашуви 1:3 ҳисобида якунланди. Шу ўйинда ярим ҳимоячи Аббосбек Файзуллаев жамоа ҳисобидаги илк гол муаллифига айланиб, Ўзбекистоннинг жаҳон чемпионатидаги голлар рўйхатини очди. Португалия эса кутилмаганда Конго терма жамоасини мағлуб эта олмади — 1:1.