"Ҳеч қандай сирлар йўқ" ёхуд Драган Черан фаолиятини Ўзбекистонда якунлайди...ми?

Бугун яна ўша сиз билан Драган Черан ҳақида сўз боради. Ўзбекистон чемпионатининг энг яхши легионери мақомини ҳамон ўзида сақлаб келаётган болқонлик ҳужумчи “Пахтакор”да ўз сўзини айтишда давом этяпти ва уни биров тўхтата олишга қодир эмасдек, гўё.

Черан кетма-кет 4 йилдан бери тўпурар бўлиб келяпти. Жорий мавсумда ҳам футболчи “Пахтакор”да 7 та ўйинда 7 та гол урди. Ўтган ойда сермаҳсуллик кўрсатгани учун Черан Суперлиганинг апрель ойининг энг яхши футболчиси дея эътироф этилди. Шундан сўнг Sports.uz журналисти Драганга бир қатор саволлар билан мурожаат қилди.  

- Драган, сизни апрель ойининг энг яхши футболчиси бўлганингиз билан табриклаймиз. Буни кутганмидингиз?

- Раҳмат...Буни кутмаслик керак. Бу амалга ошиши учун кўп ишлашингиз лозим. Буни кутиш ёки режалаштириш ярамайди.

- Сиз “Пахтакор”га келганингиздан бери чемпионат тўпурари бўляпсиз. Бу йил ҳам ҳозирча 7 та гол билан тўпурарлар орасида пешқадамсиз. Мақсадингиз 5-тўпурарликка эришишми?

- Мақсадим жамоавий мақсадлар билан боғлиқ. Яъни, жорий йил совринларни ютишдан иборат. Агар ҳаммаси кўнгилдагидек кечса, табиийки, индивидуал мукофотлар ҳам бўлади.

- 36 ёшда қандай қилиб бундай барқарорликни сақлаб қоляпсиз? Буни сири нимада?

- Ҳеч қандай сирлар йўқ, сокин оилавий ҳаёт тарзи. Тана ва ақлни бир маромда ушлаб туришлик учун ҳар куни турли машқлар ва мутолаа кўринишидаги машқлар.

- Ўзбекистон чемпионати тарихидаги барча тўпурарларни кузатяпсизми? Сизнинг натижангиз энг яхшиси...

- Бу борада кўп суриштирмадим. Кўплаб голллар киритган бир қанча собиқ ўйинчилар борлигидан хабардорман.

- Айтинг-чи, қайси дарвозабонларга гол уриш сиз учун қийин?

- Элдор Суюнов билан Санжар Қувватов.

- Драган, фаолиятингизни Ўзбекистонда якунлайсизми?

- Ҳозирча якун ҳақида ўйлаб кўрмадим. Аммо шу ерда якунлашни хоҳлаган бўлардим. Чунки бу ерда мен кўп нарсаларга эришдим.

- “Пахтакор”дан ташқари, қайси жамоадаги футболчи энг яқин дўстингиз?

- Марко Станоевич энг яхши дўст.

- Қариётганингизни ҳали ҳам ҳис қилмаяпсизми?

- Бу табиий жараён, ҳаммамиз қариймиз, барча ўзгаради, илгари ўзимиз бажара олган айрим нарсаларни қила олмаймиз. Аммо ҳаёт шундай....

Шуҳратбек Жўраев.