"Ҳимояни "бетонлаб" ташладик, "Пахтакор" билан ўйинга фақат ғалаба учун борамиз" - Дилшод Комилов

“Андижон” жамоасининг “Бухоро” майдонида қўлга киритган муҳим ғалабасидан маҳаллий мухлислари шод бўлишяпти. “Бургутлар” ҳақли тарзда уч очкони қўлга киритишди.

Айниқса, жамоанинг ҳимоя чизиғи жуда ишончли ўйин намойиш этди. Бу борада гап кетганда, истеъдодли ҳимоячи Дилшод Комиловни ҳам алоҳида эътироф этсак арзийди. Боиси, рақиб ҳужумларини қайтаришда бошқалар қатори Комилов ҳам анча фаоллик кўрсатди. Учрашувдан кейин Дилшодга бир қатор саволлар билан мурожаат қилдик.

- Учрашув ҳақида нималарни айта оласиз?

- Бизни қўллаб-қувватлаб турган мухлисларга раҳмат. Ўйин қизиқарли бўлди. Чемпионат орасидаги 21 кунлик танаффус ҳаммага билинди, деб ўйлайман. Чунки биринчи бўлимда унчалик ўйинимиз чиқмади. Иккинчи бўлим арафасида йигитлар билан гаплашиб олдик ва яхши ўйин кўрсатиб, ғалаба қозондик.

- Танаффус пайтида мураббий қандай кўрсатма берганди?

- Танаффусда мураббийимиз қийин бўлишини таъкидлади, ютқазишга ҳаққимиз йўқлигини таъкидлади. Бундай ўйинни ютқазсак жуда аламли бўлишини айтди. Тўғри кўрсатмалар берди, тактик томондан. Биринчи таймда ўхшамаган нарсаларни тўғрилаб, йигитларни иккинчи бўлимга тайёрлаб чиқарди.

- "Андижон" ҳимояни “бетонлаб” ташлади ва рақибга деярли имконият қолдирмади. Буни қандай уддаладинглар?

- Ҳимоя ҳужумдан бошланади. Олдинги чизиқдаги жамоадошларимиз ҳам бизга катта ёрдам берди. Шунинг эвазига уларга деярли имконият бермадик. Ҳали хатоларимиз бор, йўқ эмас. Ўз устимизда ишлаб, кейинги учрашувларга тайёргарлик кўрамиз. Асосийси, жамоавий ўйин. Бир-биримизни тушуниб, ҳурмат қилиб, хатоларимизни беркитиб ўйнашимиз эвазига менимча ҳимояни “бетонлаб” ташладик.

- "Андижон" 12 та ўйинда дурангсиз, 6 та ғалаба ва 6 та мағлубият қайд этди. Сизнингча, дуранг керак эмасми?

- Ҳаммаси – ғалаба ҳам, мағлубият ҳам, дуранг ҳам Худодан. Дуранг бўлмаётгани тасодиф бўлса керак. Бизга асосан ғалаба керак. Худо хоҳласа, бундан кейин ҳам мухлисларимизни хурсанд қилишда давом этамиз, деган умиддаман.

- "Андижон"даги фаолиятингиз сизда кўпроқ нимаси билан ёдда қоляпти?

- “Андижон”даги фаолиятим давомида шунга амин бўляпманки, жуда футбол севадиган халқ экан. Мухлислар ниҳоятда фаоллик билан қўллаб-қувватлашяпти. Ўз стадионимизда ўйнамаётганимизга қарамасдан ишқибозларимиз қаерда бўлсак ҳам бирга бўлиб, олқишлаб турибдилар. Шуниси билан ёдда қоляпти. Жамоамиз ҳам жуда аҳил. Коллектив биринчи ўринда. Жамоавий ўйин яхши шаклланган.

- “Пахтакор”ни қандай ютиш мумкин деб ўйлайсиз?

- “Пахтакор” билан учрашувга келсак, бўлажак баҳсга тайёргарлик“Бухоро”га қарши ўйиндан кейиноқ ечиниш хонасидан бошланди. Биз “Пахтакор” билан ўйинга дуранг учун бормаймиз. Ғалаба учун борамиз. Фақат ғалаба ҳақида ўйлаяпмиз. 29 июнь куни насиб қилса яна мухлисларимизни хурсанд қиламиз, деган умиддаман. Қўллаб-қувватлашда давом этаверишсин. Ҳаммага раҳмат, раҳбариятга ҳам. Ҳокимият ва “Ўзавтосаноат” раҳбариятига ҳам миннатдорчилик билдирамиз, бизни қўллаб-қувватлашяпти. Бундан буёғига ҳам барчани юзини ёруғ қиламиз, деган умиддаман.

Шуҳратбек Жўраев.