Ҳусанов билан бир пайтда келган юлдузни бешта гранд талашяпти

2025 йилнинг январь ойида “Манчестер Сити” таркибини кучайтириш мақсадида Абдуқодир Ҳусанов, Нико Гонсалес, Витор Рейс ва Умарни Мармушни олган эди.

Орадан бир йил ўтиб, бу ўйинчилар орасидан ҳам “шаҳарликлар”нинг асосий таркибида ўйнашга қодирлари сараланиб бормоқда.

Ҳужум чизиғидаги рақобатнинг кучайиши, жамоага Антуан Семеньонинг келиши, Жереми Докунинг ўйини яхши томонга ўзгаргани ортидан мисрлик легионер Умар Мармушнинг ўйин вақти  янада қисқариши мумкин.

Мармуш атрофида юзага келган вазиятни кузатиб бораётган Европанинг бир қатор клублари уни январь ойидаёқ трансфер қилишга тайёр.

The Touchline нашри хабарига кўра, 26 ёшли ҳужумчини Туркиянинг “Фенербаҳче” ва “Галатасарой”, Англиянинг “Тоттенхэм”, Испаниянинг “Атлетико” ва Италиянинг “Милан” клуби чорламоқда.

Бироқ экспертлар таъкидлашича, Хосеп Гвардиола Мармушни мавсум ўртасида қўйиб юбормоқчи эмас. Испаниялик мутахассис ҳужумчи Эрлинг Холандга тушаётган юкламанинг бир қисмини кўтаришини ва асосий таркибга кириш учун жиддий курашишини истайди.

Бироқ Мармуш “Манчестер Сити”ни тарк этиш истагини билдирса, клуб раҳбарияти бу масалани ёзги трансферлар вақтида кўриб чиқишга рози.

Transfermarkt портали мутахассислари унинг трансфер қийматини 65 миллион евро деб баҳолаган.