Ҳусанов экспертлар эътиборини “Ланс”га қаратди

Европа футболи экспертлари ФИФА кунлари муносабати билан эълон қилинган танаффусдан фойдаланиб, клубларнинг ёзги трансферлар мавсумидаги кўрсаткичларини таҳлил қилмоқда ва бу орқали мухлисоар эътиборига қизиқарли маълумотлар тақди этиляпти.

Франциянинг юқори дивизиони – Лига 1 клублари трансфер сиёсатини ўрганиб чиққан мутахассислар жамоаларнинг натижаларига баҳо берди.

Бу мавсум 18 та жамоа Лига 1 мусобақасида иштирок этиш учун жами 483 нафар футболчини рўйхатдан ўтказди. Шулардан 57,1 фоизи, яъни 276 нафарини хорижлик чарм тўп усталари ташкил қилади.

Французлар билан ёнма-ён дунёнинг 74 мамлакатидан келган футболчилар Франция чемпионлиги учун кураш олиб боради. Легионернинг аксарияти Африкадан. Лига 1да энг кўп футболчига эга мамлакатлар учлигини Сенегал (22 та футболчи), Марокаш (17 та футболчи) ва Кот-д'Ивуар (17 та футболчи) ташкил қилмоқда. Кейинги ўриндаги Бразилия бу лигага 15 та легионер жўнатган.

Францияда Осиё вакилларидан Япониядан учта, Иордания, Ўзбекистон, Жанубий Корея, Бурундидан биттадан футболчини кўришимиз мумкин.

Франция футболини ёритаётган манбалардан бири –  https://www.lensois.com сайти жамоаларнинг ёзги трансферларини баҳолади.

Унга кўра, мамлакатнинг амалдаги чемпиони – ПСЖ энг фаол бўлди. Мавсум олдидан Лионель Месси, Сархио Рамос, Неймар каби жаҳон миқёсидаги юлдузларидан айрилган парижликлар кетганлар ўрнини 12 нафар футболчи билан тўлдирди.

“Реймс” клуби ҳам трансфер бозорида анча самарали ҳаракат қилди. Юқори ўринлар учун курашиш имкони эга бўлиш учун улар 11 та трансферга қўл урди.

Трансферлар бўйича “Ланс” учинчи ўринда тилга олинмоқда. Бир неча жамоа худди лансликлар сингари ўнтадан янги ўйинчини ўз сафига қўшиб олган. Лекин трансфер экспертларининг эътиборини мамлакат вице-чемпионлари Ўзбекистондан ўйинчи олгани тортди. Беларуснинг “Энергетик-БГУ” жамоасидан “Ланс”га кўчиб ўтган Абдуқодир Ҳусанов Франция чемпионатлари тарихидаги биринчи ўзбек футболчиси бўлди. Бундан ташқари, легионеримиз Беларусдан Лига1 совриндорига кўчиб ўтган биринчи ўйинчи сифатида ҳам тарихда қолди.

Қолаверса, “Ланс” бошқа 17 та клубдан фарқли равишда олис Колумбиядан ўйинчи олиб келган ягона жамоага айланди. Оскар Кортес илк бор Европада тўп тепиш имконига эга бўлди.

Ёзги трансферлар мавсумида “Ланс”дан ташқари, “Лион”, “Нант”, “Гавр”, “Марсель”, “МЕц” ва “Лорьян” ҳам ўнтадан янги футболчи билан шартнома қилди.  

“Ницца” ва “Монпелье” раҳбарияти эса, бу гал бироз тежамкорлик қилди. Бу клублар бештадан янги футболчини жалб қилди.

Умумий ҳисобда Лига 1 клублари ёзда 853 миллион еврога ўз ўйинчиларини сотиб, ғазнага кирим қилди. 18 та жамоа таркибини кучайтириш учун жами бўлиб 806 миллион евролик харидларни амалга оширди.

Мексика тўқнашув олдидан Ўзбекистоннинг икки қуролидан хавотирда: Бири Шомуродов, иккинчиси...

Францияда ўзбек футболчиларини кузатишяпти

Шомуродовни уйғотиб қўйинглар...

Италиялик мухлислар Шомуродовни муҳокама қилмоқда: яхши гап ҳам, танқид ҳам етарли!

Ҳусанов жамоаси ҳақида ҳайратланарли факт!

Шомуродов трансфери ўзини оқлайдими?

Фанатлар Шомуродовдан нимани талаб қиляпти?