Ҳусанов хайрлашиб қол, Холандни олиб кетадиган клуб топилди
“Манчестер Сити”нинг энг зўр тўпурари Эрлинг Холанд ўтган йили клуб билан амалдаги шартномасини ўн йилга узайтирган эди. Англия Премьер-лигасида энг катта маош олаётган форвард келишувга кўра, 2034 йилнинг 30 июнига Манчестерда қолиши керак.
Аммо экспертларнинг таъкидлашича, норвегиялик юлдузнинг шартномасини бошқа клубларга ўтиш имконини берувчи бандлар бор.
Шу боис, 25 ёшли форвард Испания чемпионати грандлари – “Реал” ва “Барселона” нишонида турибди. “Реал” раҳбарияти Килиан Мбаппени қўлга киритиб, тўпурар ҳужумчи масаласини ҳал қилган. “Барселона” учун кўп гол ура оладиган ўйинчи топиш долзарб масала.
Чунки сўнгги уч мавсумда бу вазифани бажариб келаётган 37 ёшли Роберт Левандовскининг ёши ўтиб қолмоқда.
El Nacional нашрининг маълум қилишича, “Барселона” президенти Жоан Лапорта жамоасига мега юлдуз олиб келмоқчи. Клуб хўжайини Эрлинг Холанд каталонияликлар учун тўп тепишини истаяпти.
Гарчи Холанднинг трансфери ўта қиммат турса-да, бу Лапортани чўчитаётгани йўқ. У агар “Манчестер Сити” жорий мавсум ҳам ўтган галгидек беқарор натижалар қайд этса, Эрлинг Холандни олиш имконияти ошишига ишонмоқда.
Клуб спорт директори Деку асосий тўпурар позициясига “Атлетико”дан Хулиан Альваресни олиб келмоқчи. Аргентиналик юлдуз илгари Холанд билан рақобат қила олмагани учун “Манчестер Сити”ни тарк этиб, Мадридга келганди. Жоан Лапорта Деку тақдим қилган вариантни маъқулламади ва харажат қиладиган бўлса, айнан Холандни олиб келиш кераклигини уқтирмоқда.
“Манчестер Юнайтед” Ҳусановга қарши ўйнаган футболчини сотиб юборади
Мавсумни бўш ўтказаётган “Манчестер Юнайтед” таркибда ўзгаришлар қилишни режалаштирмоқда. Хусусан, клуб қимматбаҳо ўйинчилардан бири Мануэль Угартени сотиб юбормоқчи.
24 ёшли уругвайлик таянч ярим ҳимоячига Италиянинг А Сериясининг бир неча клубларидан жиддий қизиқишлар бўляпти. Бу ҳақда таниқли инсайдер Фабрицио Романо хабар берди.
Манчестерликлар уни қўйиб юборишга қарши эмас. Бироқ бу трансфер учун камида 60 миллион евро талаб қилишмоқда. “Юнайтед” бу футболчини 2024 йилнинг ёзида ПСЖдан 50 миллион еврога трансфер қилган эди.
Мануэль Угарте АПЛнинг тўртинчи турида “Манчестер Сити”га қарши 80 дақиқа ўйнаб, жамоасини мағлубиятдан қутқаришни уддалай олмади.
Аслида Уругвайнинг “Феникс” жамоаси тарбияланувчиси бўлган Угарте Европага 2021 йили олиб келинган. Шундан кейин у Португалия чемпионатида “Фамаликан” ва “Спортинг”, Францияда “Пари Сен-Жермен” клублари шарафини ҳимоя қилган. Манчестерликлар билан амалдаги шартномаси 2029 йилнинг ярмигача давом этади.
Фоден энг зўр ўйинчи бўлмоқчи
“Манчестер Сити” ярим ҳимоячиси Фил Фоден “Манчестер Юнайтед”га қарши юқори савияда ўйин кўрсатганидан кейин уннинг АПЛда йил ўйинчиси бўлишига сабаб бўлган даражага чиқмоқчи эканини таъкидлади.
Маълумки, “шаҳарликлар” ҳужумкор футболчиси 2023-2024 йилги мавсумда Премььер лиганинг энг зўр ўйинчиси, деб эътироф этилганди. Ўтган мавсум эса, Фоденнинг ўйинида кескин пасайиш кузатилди.
- Менинг спорт формам ҳақида гап-сўзлар бўлди. Буни кўрмасликнинг иложи йўқ. Ҳозирги пайтда ўзимга нисбатан фақат салбий муносабатни кўряпман. Биз яшаётган олам шунақа.
Сен мавсумнинг энг яхши ўйинчиси бўлганингда, зиммангга юкланадиган стандартлар ҳам ошиб кетади. Мен буни тўғри тушунаман.
Салбий изоҳларни ўқиганимда уларга жавобан яна ўзимнинг энг юқори даражамга чиқишим муҳимлигини ҳис қиламан, - деди Фил Фоден.
Comments