Ҳусановдан буни кутмаган эдим...

Ёзги трансферлар мавсумининг энг кутилмаган келишувларидан бири Беларусь олий лигасининг мусобақа жадвалида энг қуйи поғонада қайд этилган “Энергетик-БГУ”нинг ўзбекистонлик легионери Абдуқодир Ҳусановнинг Франция вице-чемпиони  “Ланс” жамоасига кўчиб ўтгани бўлди.

Маълумки, Франция чемпионатининг ювори дивизиони – Лига 1 Европанинг энг кучли беш чемпионатидан бири ҳисобланади. Бу турнир истеъдодли футболчиларни кўп кашф этиши билан ажралиб туради.

Адолат нуқтаи назаридан таъкидлаш жоизки, 19 ёшли Абдуқодир Ҳусановнинг “Ланс” скаутлари назарига тушишида Беларусь чемпионатининг ҳиссаси катта эмас. Марказий ҳимоячимиз 20 ёшгача бўлган футболчилар ўртасидаги икки мусобақа – Тошкентда ўтказилган Осиё чемпионати ва Аргентина мезбонлик қилган жаҳон чемпионатида хорижлик мутахассислар эътиборини қозонгани айтилмоқда.

Шундай бўлса-да, Беларусдан ўзбек футболчининг кучли бешлик чемпионатига йўл олиши тарихий воқеа сифатида қайд этилди.  Бунгача ушбу мамлакат футболи тарихида бирорта ўйинчи олий лигадан “топ-5” лигаларидаги совриндор жамоага кўчиб ўтиши кузатилмаган эди.

“Энергетик-БГУ” жамоасида Абдуқодир Ҳусанов билан бирга ўйнаган Алексей Семёнов ўзбек футболчисининг Франция чемпионатига кўчиб ўтганига муносабат билдириб, бу ёш ўйинчиларга яхшигина ўрнак бўлишини таъкидлади.

- Мен Абдуқодир Ҳусанов бирорта яхшироқ клубга ўтиб кетишига амин эдим. Лекин “топ-5” лигадаги жамоага йўл олиши хаёлимга ҳам келмаган. Мен у учун хурсандман ва Францияда ҳам ўзини кўрсата олишига ишончим комил.

Бу трансфер бизнинг ёш футболчиларимизга етакчи чемпионатларга ўтиш имконияти борлигини кўрсатиб берди. Бунинг учун қаттиқ меҳнат қилиш ва мақсад сари интилишдан асло тўхтамаслик талаб этилади.

Ҳусанов бошқаларга қараганда, ўзига ишонч билан ҳаракат қилиши, ўйин сифатлари юқори экани, савияси янада баланд жамоаларда ҳам ўйнай олиш салоҳияти аввал-бошдан билиниб турар эди, - деди Алексей Семёнов.

Таъкидлаш жоизки, Абдуқодир Ҳусанов “Бунёдкор” ёшлар жамоасида ўйнаган бўлса-да, профессионал футболдаги фаолиятини “Энергетик-БГУ” клубида бошлади. Ҳамюртимиз Беларусь олий лигасида қарийб бир ярим йил минсклик “талабалар” жамоасида тўп тепди.

“Ланс” ёзда легионеримизни ўз сафига қўшиб олиш учун Беларусь клубига 100 минг евро миқдорида бадал пули тўлади.

Абдуқодир Ҳусанов Франция чемпионатининг бешинчи турида “Мец” билан бўлган ўйинда дебютини нишонлади. Истеъдодли футболчимизнинг ўйини мухлису мутахассислар томонидан юқори баҳоланди.

Ҳусанов Франция чемпионатида майдонга тушган биринчи ўзбек футболчиси сифатида тарихда қолди.

Файзуллаев қаерда ўйнаши кераклигини айтишди

Легионер мана шундай бўлади: Зўрлигини исботлаш учун Файзуллаевга 45 дақиқа кифоя қилди!

Ўзбекистон ва Россия тўқнашувида олтита гол бўлди

Шомуродовни уйғотиб қўйинглар...

Фанатлар Шомуродовдан нимани талаб қиляпти?

Шомуродовдан қандай қилиб максимум фойда чиқариш мумкин?