Игуаин: Мен ҳам, Пирло ва Роналдо ҳам хоин эмасмиз!

Аргентиналик ҳужумчи Гонсало Игуаин 2016 йили “Наполи”дан ашаддий рақиб - “Ювентус”га кўчиб ўтганидан пушаймон эмаслигини таъкидлади.

Ўша трансфер туфайли неаполлик мухлислар Игуаинни ҳамон хиёнатда айблаб келади.

- Мен “Наполи”дан “Ювентус”га келганимдан пушаймон эмасман. Мен хоинманми? “Ривер Плейт”дан “Бока Хуниорс”га қанчаси ўтганини биласизми? “Интер”дан “Милан” ёки “Ювентус”га-чи? Мухлислар Пирло, Роналдо ва бошқа кўп футболчиларни ҳам хиёнатда айблаган. Бу футболнинг бир бўлаги.

Келажакда мен АҚШда тўп суришим мумкин. Ҳозир кўпчилик ўша томонларга кетмоқда. Ҳозир эса, “Ювентус” билан яна бир йиллик шартномам бор.  Нима бўлишини энди кўрамиз, - деди Гонсало Игуаин.

Игуаин якунланган мавсумда 44 та учрашувда 11 та гол уриб, саккизта голли пас узатди.