Ижарада ўйнаётган легионеримизга нима ёқмади ёхуд терма жамоамизнинг Осиё чемпионатида имконияти қандай?

Ўзбекистон мезбонлик қиладиган U-23 Осиё чемпионати ҳам бошланиш арафасида. Энди барчамизнинг нигоҳимиз ушбу қитъа биринчилигига қаратилади.

Тимур Кападзе бош мураббийлик қилаётган вакилларимиздан эса умидимиз катта. Мусобақа олдидан терма жамоамизнинг етакчи ўйинчиларидан бири – Одил Абдумажидов айрим саволларга ўз фикрларини айтиб ўтди.

- Терма жамоамиз мезбон сифатида U-23 Осиё чемпионатига тайёргарлик кўряпти. Мусобақадан олдин нималарни ўйлаяпсиз ва тайёргарлик қандай кетяпти?

- Осиё чемпионати баҳслари учун тайёргарлигимиз жуда яхши ўтяпти. Биз ўз майдонимиздаги мусобақада ижобий қатнашиб, Худо хоҳласа ҳар бир ўйинда ғалаба қозонишни ўйлаяпмиз. Бу турнир юртимизда ўтади. Гарчи рақиблар ўзимиздан икки ёш катта бўлса ҳам Осиё чемпионати бизда ўтказилиши жамоамизга куч беради.

- Мусобақанинг мамлакатимизда ўтиши жамоамизга ортиқча муаммо туғдирмайдими? Айтайлик, босим бўлиши мумкин. Ҳар ҳолда қўшимча масъулиятни юклаши аниқ.

- Халқимиз олдида тўп суриш қийинчилик туғдирмаса керак, деб ўйлайман. Бу ҳол бизга фойдали бўлади, деб умид қиламан.

- Гуруҳимизда Эрон, Қатар ва Туркманистон терма жамоалари жой олган. Дастлабки учрашувни туркманистонликларга қарши бошлаймиз. Сизнингча, гуруҳимиздаги асосий рақиб ким?

- Бу ёш тоифасида жамоалар қанақа бўлишини олдиндан билиб бўлмайди. Айни пайтда биринчи турда Туркманистон терма жамоасига қарши ўйин учун тайёргарлик кўряпмиз. Илк учрашувни яхши ўтказиб олсак, кейинги ўйин ҳақида ўйлаймиз. Ҳозир эса фақат Туркманистонга қарши учрашув ҳақида ўйлаяпмиз.

- Асосий мақсадимиз хусусида гапирсангиз ва имкониятимизни қандай баҳолайсиз?

- Худо хоҳласа, чемпионлик учун имкониятимиз етарли. Мусобақа давомида барчасини билиб оламиз. Лекин бизни тайёргарлигимиз яхши. Шунга яраша барчасиз биз учун ижобий бўлади, деган умиддаман.

- Осиё чемпионатида яна қайси терма жамоаларни чемпионлик учун фаворит деб ўйлайсиз ва яна сюрприз ҳам кўришимиз мумкинми?

- Ҳар мусобақада бўлгани каби Япония, Жанубий Корея термалари фаворитлар қаторида бўлса керак. Лекин, албатта бир нечта сюрприз кўрсата оладиган жамоалар ҳам бўлади.

- Бу йил илк бор легионер сифатида Қозоғистон чемпионатида фаолият олиб боряпсиз. Айтинг-чи, “Ордабаси”даги ишларингиз қандай?

- Клубимдаги ишларим кўнгилдагидек. У ердаги барча нарсадан кўнглим тўқ. Шундай неъмат берганига Худога шукр.

- Легионер ўйинчига айлангач, ўзингизда қандайдир ўзгаришларни ҳис қиляпсизми?

- Қозоғистон чемпионатининг савияси яхши. Шу боис уларнинг чемпионати олдинга қараб кетяпти. Ҳар бир клубида юқори даражадаги легионерлари бор. Ажаблантиргани шу бўлдики, 5-6 та клуб сунъий қопламали майдонда ўйнайди. Шу томони бироз ёқмади.

- “Ордабаси”дан кейинги режангиз қандай? У ерда яна қанча муддат қолмоқчисиз? Таклифлар ҳам бўлаётган экан...

- “Ордабаси” клубига бир йилга ижарага борганман. “Металлург” билан яна икки йиллик шартномам бор. Мақсадларим фақат олий. Ўзимни ҳар томонлама кўрсатиб, янада кучли клубларга ўтмоқчиман. Лекин ҳозирча таклифлар ҳақида эшитмадим. Очиғи, бунга эътибор ҳам бермаяпман. Бу йилни яхшилаб ўтказиб олсам, кейин ота-онам билан ўйлаб кўрамиз.