Иккинчи ёшлигини ўтказаётган Пауло Дибала

Бундан 10 йил олдин "Палермо"да 9-рақамда ҳаракат қилаётган Дибала исмли бир йигитча ажойиб ҳаракатлари, футболчилардан ўтиб кетаётгани ва дарвозага узоқ масофадан ураётган голлари орқали топ клублар эътиборига тушади. Трансферни эса "Ювентус" илиб кетди ва аргентиналик футболчи бошқа даражага чиқди. Кейинги йилларда Пауло туринликлар билан "Барселона"ни плей-оффда чиқариб юборгани, ЧЛ финалига етиб боргани-ю, қаторлатиб А Серия чемпиони бўлганлиги билан эсаланади. Аммо қаҳрамонимизнинг кейинги фаолиятида бошқалар каби паст-баландликлар бўлди. 

Мессининг издоши
2017 йил баҳор ойи. "Барселона" ПСЖни тарихий камбэк қурбони қилиб, чорак финалга йўл олган ва кейинги рақибидан ҳам ўтиб, ярим финалга чиқиши кутилаётган пайт. Аммо Италияда бир жамоа бор эдики, клуб Месси ва унинг дўстларини тўхтатади.

Ярим соат ичида Дибала каталонияликлар дарвозасини икки бора ишғол қилди. Дастлабки голда қанотдан Куадрадо унга пас берди, вингер эса айланиб олиб, зарба йўллади ва Тер Штеген ожиз. Иккинчисида чап қанотдан уюштирилган ҳужумни Пауло чиройли якунлаб қўйди. Барчани нигоҳи унда. Қандай қилиб бу йигитча осонлик билан гол уриб кетяпи? Наҳотки терма жамоадаги ишлар учун Мессидан аламини олаётган бўлса? Ҳа, Дибала миллий жамоада Лионель билан ўйнаш мен учун бироз қийинроқ, дегани учун мухлислар танқидига учраганди. Айримлар уни устидан кулиб, кўчадаги дўстларинг билан футбол ўйнаш қийинроқ бўлади, лекин Месси билан эмас, деб киноя ҳам қилишган. Аслида ҳам у тўғри гапирганди. Иккаласи ҳам чапақай, иккаласи ҳам кучли техникага эга, иккаласининг позицияси бир хил. Уларни солиштириш ҳам бошланган пайтлар. Аргентина бўлса қийналиб, ЖЧга йўл олади ва гуруҳдан чиқибоқ турнир билан хайрлашади. Хорхе Сампоали Дибалага кўп ҳам имкон бермади, лекин бу иши учун қаттиқ танқид қилингани ҳам йўқ. Кейинги йилларда нафақат терма жамоа балки клубида ҳам Дибала учун оғир дамлар бошланди. 

Роналду билан ҳам ўйнаш қийин

Дибала Месси ва Роналду билан бирга ўйнаган кам сонли футболчилардан ҳисобланади. Шу билан бирга, унинг иккала афсона билан тил топишиши қийин ҳам бўлган. Криштиану туринликлар сафига кўчиб ўтганидан кейин бир мавсум олдин 34 та голда иштирок этган аргентиналикнинг майдондаги дақиқалари нисбатан камайиб, гол+пас тизимида 14 балл тўплади. Ўшанда Роналду ва Дибалани бир майдонда ўйнатиш қийин, деганди Сарри. Кейинги йиллар ичида раҳбарият томонидан амалга оширилган нотўғри ишлар натижасида "Ювентус" ҳам қулашни бошлади. Қулаётган минорадан эса Роналду Манчестер шаҳрига йўл олди. Ҳар йили Италияда осон чемпион бўладиган "Кекса синьора" тўхтатилди. Ўша пайтларда Дибаланинг фаолиятида ҳам пасайишлар юз берганди. Бир пайтлар Мессининг издоши, терма жамоада асосий лидер бўлиши кутилган футболчининг асосий таркибга киритилиши қийин масала бўлиб қолди. Унинг ўрнига Роналду ва Мората жуфтлиги маъқул кўриларди. Шу боис ҳам Пауло 2020/21 мавсумда 26 тагина баҳсда майдонга тушди. Криштиану кетганидан кейин бу рақамлар кўпайган бўлиши мумкин, лекин клуб у билан шартномани янгиламади. 

Қайтиш

2022 йилнинг ёз ойида  Дибала ўзига янги клуб қидира бошлади. Топ клублардан умид қилиш қийинроқ, лекин "Интер" курашда бор эди. Аргентиналик футболчи бўлса таклифни қабул қилмади. Умуман унинг нияти Италияда қолиш эмасди. Якунда "Рома"ни танлади ва товон пули 12 миллион евро қилиб белгиланди. Дибала дастлабки мавсум учун ёмон статиска қайд этгани йўқ, 38 ўйин, 18 та гол ва 7 та ассист. А серияда 12 марта рақиблар дарвозасини ишғол қилганди. Секин-секин натижалар яхшиланиб бормоқда. Бу мавсум қаҳрамонимиз чемпионат доирасида аллақачон 12 та гол уриб бўлди. Де Росси жамоани қабул қилиб олганидан кейин "Рома" ҳам жонланди. А Серия доирасида бўлиб ўтган "Торино"га қарши баҳсда Дибала уч бора рақиблар дарвозабонини ранжитди. Голлардан бири шунчаки шедевр эди. "Торино" билан бўлиб ўтган учрашувда ҳам вингер ўз ҳисобига битта гол ёздириб қўйди. 30 ёшга тўлган Пауло ўзининг пик даврига қайтаётгандек. Фақат бу сафар синмас бўлиб, чунки эски хатолардан хулоса чиқарилган.