Илҳом Мўминжонов "Нефтчи"нинг 7:0 ҳисобидаги ғалабасидан сўнг нималар деди?

Бугун бўлиб ўтган "Нефтчи" - "Оқ-тепа" (7:0) баҳсидан сўнг ўтказилган матбуот анжуманида мезбонлар бош мураббийи Илҳом Мўминжонов ўзининг ўйин ҳақидаги фикрларини билдириб ўтди.

- Аввалом бор, бугунги ғалаба билан барча мухлисларимизни табриклайман.Бугун футболчиларимиз борларини бериб, юракдан чиқариб, маҳоратли ўйин кўрсатишди.

Улуғбек Хошимов билан Руслан Розиев бугунги кунда Олимпия терма жамоаси аъзолари ҳисобланади. Шу туфайли улар термага жалб этилиб, халқаро мусобақада қатнашиш учун сафарга йўл олган. «Бухоро» билан бўлиб ўтадиган ўйинда ҳам иштирок эта олишмайди.Тўғри, бугунги ўйинда уларнинг йўқлиги билинди. Аммо, ҳозирда захирамиз яхши футболчилардан ташкил топган. Масалан, Сардор Абдунабиев ёш ва маҳоратли футболчиларимиздан бири.У ўзини ижобий томондан намоён қилди ва бугунги ўйинда 5 та тўп киритиб, ҳаммамизни хушнуд этди.

Қолган футболчиларимизга ҳам бугун имконият бердик. Лекин захирадан майдонга тушган ўйинчилар имкониятдан унумли фойдаланишди деб айтолмайман. Ўйлайманки, кейинги «Бухоро» клуби билан бўлиб ўтадиган ўйинга жиддий тайёргарлик кўрамиз. Чунки,«Бухоро» жамоаси бугунги кунда яхши шаклланган жамоа ҳисобланади.

Қолган ўйинларда ҳам ғалаба қозониб,очко олишда давом этамиз,-дейди жамоа бош мураббийи.

«Нефтчи» матбуот хизмати