Илёс Қурбонов "Металлург"ни Суперлигада олиб қолганидан сўнг: "Жамоани бошқа мутахассис мендан яхшироқ билмаса керак"

Суперлиганинг охирги йўлланмаси учун "Олимпик" ва "Металлург" жамоалари куч синашди. Беллашув 2:1 ҳисобида бекободликлар фойдасига ҳал бўлди. Учрашувдан кейин жамоа устозлари иштирокида матбуот анжумани бўлиб ўтди. Унинг биринчи қисмида “Металлург” мураббийи Илёс Қурбонов иштирок этди.

-  Барчага ассалому алайкум. Ўйин ҳақида гапирадиган бўлсак, охирги тўрт, беш, олтита турнинг барчаси финалдек бўлди. "Бунёдкор"дан бошланиб, ОКМК, "Сурхон", "Насаф" ва бугунги беллашув ҳам финал эди. Аввал ҳам айтганимдек, биз майдонга финалдек чиқишимиз керак эди. Ҳар бир очко биз учун муҳим эди. Рақибни яхши билардик. Бизнинг режамиз бўйича юқорироқдан прессинг қилишимиз керак эди — уддаладик деб ўйлайман. Жуда кўп бор уларнинг дарвозасига яқин зоналарда тўпни олиб қўйдик. Қайсидир паллаларда совуққонлик етишмади, иккинчи бўлимда эса қайсидир вазиятларда майдон ҳолати бизга панд берди. Вазиятлар кўп бўлди. Ҳақли ғалабага эришдик. Аввал айтганимдек, "Металлург" Суперлигадан тушиб кетмаслиги керак эди. Буни 6 тур олдин айтиб ўтгандим. Биз қуйига тушиб кетишга лойиқ эмасмиз. Ўйлайманки, олдимизга қўйилган вазифани бажардик. Бунинг учун болаларга раҳмат айтаман, охиригача ўйнашди, курашишди", - деди Илёс Қурбонов.

-  Мавсумни 2:1 ютиб туриб, 2:2 ҳисобида дуранг билан бошладик. Тўғри, бизда қайсидир маънода психологик жиҳатдан қўрқув, босим бор эди. Ҳар бир хато учун қўрқардик. Мавсум охирида 3-4 та тур қолганида бош мураббий бошқа клубдан таклиф бўлиб, кетиб қолди. Мен бу жамоада узоқ йиллардан буён ишлайман. Жамоани бошқа мутахассис мендан яхшироқ билмаса керак. Сабаби мен етти, саккиз, ўн йилдан буён клубдаман. Мени қилган ишим, вазифам йигитларга ишонч бериш эди. Билардим, йигитлар яхши футбол ўйнашини. Сабаби ҳар бир футболчимиз малакали ўйинчилар деб ўйлайман. Уларга фақатгина психологик жиҳатдан ишонч бериш муҳим эди. Қўлимдан келди, буни уддаладим ва "Сурхон", "Насаф"га қарши ҳал қилувчи, жуда қийин ўйинларни ютдик. Эътибор қилган бўлсаларинг, биринчи даврада ҳам айнан шу "Олимпик", "Насаф" ва "Сурхон"га қарши ўйинларда бошқарув менинг қўлимда қолиб кетганди. Ўшанда Веско Стешевич ишдан олинганидан кейин. 

-  Мен учун "Насаф", "Сурхон" янгилик эмас эди. Уларнинг қандай ўйнашини, қандай ҳимояланиб, қандай ҳужум қилишини билардим. Эътибор берган бўлсангиз, биринчи даврада ҳам биз "Насаф"га ҳеч қандай имконият қолдирмагандик. Айтмоқчиманки, бизнинг чемпионни ўз майдонида ютишимиз тасодиф эмасди. Истаган мутахассис ўша баҳсни таҳлил қилиб кўриши мумкин, биз ўйин томонидан "Насаф"га имкон бермадик.

-  Айтиб ўтганимдек, бу йил жамоамиз учун оғир ўтди. Омадсиз стартдан кейин анча қийналдик. Тўғри айтдингиз, 14 та дуранг ўйнадик ва бугун ўша дуранглар бизга асқотди. Ўша баҳсларда дуранг эмас, мағлуб бўлишимиз ҳам мумкин эди. Натижада, жамоа тақдири анча олдин ҳал бўларди. 

-  "Қўқон-1912" ўйинига келсак — рақиб оддий жамоа эмас. Яхши легионерлари бор, олий лигада тўп тепган футболчилари бор. Бу йил бизда ПРО-лигада оддий жамоалар йўқ. ПРО-лигадан тўртта жамоа Суперлига йўлланма олиши шунчаки эмас. Бу оддий ҳолат эмас. Ўша "Бухоро", ўша "Машъал", ўша "Қўқон". Тушуняпсизларми, улар ёмон жамоа эмас. Қўқонда ўйинга кўрсатма бошқача эди. Биз кўпроқ тўпни назорат қилишимиз керак эди. Лекин биз кўпроқ рақибнинг ўйинига мослашиб қолдик. 75 ёки 77 дақиқада битта стандарт, бурчак тўпидан гол уриб кетишди. Назоратни йўқотиб қўйдик. Пенальтилар серияси эса ўша ерда ҳам айтиб ўтдим, бу психология ва омад. Омад ўшанда "Қўқон"га кулиб боқди. 

-  Кейинги йил бўйича ҳали режа тузганимиз йўқ. Чунки асосий вазифамиз — Суперлигада "жон сақлаб қолиш" эди. Кейинги йилга қайси мутахассис келишини раҳбарият ҳал қилади. Охирги турларда менга ишониб, жамоани топширишди. "Металлург" учун, Бекобод учун қўлимдан келганини қилдим. Хурсанд бўлганим, йигитлар мен нимани истаётганимни тушунишди, менга қулоқ солишди ва биз мухлислар истаган шу натижага эришдик. Қолганини раҳбарият ҳал қилади".