Indoneziya bosh murabbiyi: "Butun Indoneziya xalqidan ushbu mag‘lubiyat uchun uzr so‘rayman!"

Osiyo o‘yinlari nimchorak final bosqichidan o‘rin olgan O‘zbekiston - Indoneziya o‘yini o‘z nihoyasiga etdi. Uchrashuv asosiy vaqti 0:0 hisobida yakunlandi. Ekstra-taymlarda esa vakillarimiz 2:0 hisobida zafar quchdi. 

Uchrashuvdan so‘ng tashkil etilgan matbuot anjumanida Indoneziya termasi bosh murabbiyi Indra Syafri ishtirok etdi va quyidagi fikrlarni bildirdi.

"Xayrli kech hammaga! Qiyin o‘yin o‘tkazdik. Bugun ayrim vaziyatlarda xatoga yo‘l qo‘ydik va shu sabab jazolandik. Tarkibdagi barcha yigitlarga o‘z minnatdorchiligimni izhor etaman. Biz musobaqada munosib ishtirok etdik. 

O‘zbekistonni keyingi bosqichga chiqqani bilan tabriklayman! Ularning kuchli raqib ekanini bilardik va bugun raqib buni isbotlay oldi. 

Gol o‘tkazib yuborishimizdan oldin biz o‘yinni yaxshi nazorat qilib turgandik. Ammo gol urilgach, hammasi o‘zgarib ketdi. Butun Indoneziya xalqidan ushbu mag‘lubiyat uchun uzr so‘rayman!", - dedi mutaxassis.