Инфантино энди аёллар ўртасидаги жаҳон чемпионати иштирокчилари сонини ҳам оширмоқчи

ФИФА президенти Жанни Инфантино аёллар футболида ҳам ислоҳотларни амалга оширмоқчи.

The New York Times нашри тарқатган хабарга қараганда Инфантино аёллар ўртасидаги жаҳон чемпионати иштирокчилари сонини 24тадан 32тага кўпайтиришни таклиф қилмоқда. Айтиш лозимки, бу ўзгариш 2023 йилги мундиалдан бошлаб тадбиқ қилиниши мумкин.

Маълумот учун, 1991 йил аёллар ўртасида ўтказилган илк жаҳон чемпионатида 12та терма жамоа иштирок этган. Кейин 1999 йилга келиб иштирокчи мамлакатлар сони 16тага оширилди. 2015 йилдан бошлаб эса ушбу кўрсатгич 24тага етди.

Бундан ташқари Инфантино ушбу мусобақанинг соврин жамғармасини икки баробарга оширишни ва ўз футболчиларини мундиалда иштирок этишини таъминлаган клубларга мукофот пули беришни таклиф қилмоқда.

Эслатиб ўтамиз, жорий ёз Францияда бўлиб ўтган аёллар ўртасидаги жаҳон чемпионатининг мукофот жамғармаси 30 млн еврони ташкил этди. Таққослаш учун, эркаклар ўртасидаги мундиалнинг соврин жамғармаси 400 млн еврони ташкил этади.

Фикрлар

Фикр қолдириш учун авторизациядан ўтинг!