Инфантино ЖЧ олдидан журналистларни футбол ҳақида кўпроқ гапиришга чақирди

ФИФА президенти Жанни Инфантино Жаҳон чемпионати–2026 старт олиши арафасида ўтказилган матбуот анжуманида журналистларни футболнинг ўзи ҳақида кўпроқ ёритишга чақирди.

Жаҳон чемпионати 11 июндан 19 июлга қадар АҚШ, Канада ва Мексика ҳудудида ўтказилади.

"Бу – хурсандчилик ва байрам онлари. Жуда хурсандманки, яна бир неча соатдан сўнг ушбу тўп майдон марказидан ўйинга киритилади, кейин эса соврин топширилади. Бу энг ҳайратланарли кубок. Бутун дунёдаги одамларга орзу улашадиган трофей ва тўп.

Умид қиламанки, биз бир оз бўлса-да, футбол ҳақида гаплашишга улгурамиз. Ахир биз бу ерга шунинг учун келганмиз-ку, тўғрими?", – деди Инфантино.

ФИФА раҳбари Жаҳон чемпионатининг АҚШда ўтиши борасида афсусланмаслигини таъкидлади: "Муаммолар Канадада ҳам, Мексикада ҳам бор, бундай кўламдаги тадбир учун бу одатий ҳол. Уларнинг барчасини бирданига ҳал қилишнинг иложи бўлмаса керак", – дея қайд этди у.

Инфантино, шунингдек, Сомалидан келган ҳакамнинг АҚШга кириши тақиқлангани ҳақида ҳам тўхталиб ўтди: "Баъзан бир оз дам олиш ҳам керак. Биз ҳукуматлар ёки полицияни бошқарадиган дунё подшоҳлари эмасмиз", – деди у.

Маълумот учун, АҚШга келаётган айрим футболчилар ва ҳакамлар чегарада жиноятчилардек қаттиқ текширувдан ўтказилаётгани ҳақида хабарлар тарқалган. Африкада энг яхши ҳакамлардан бири сифатида эътироф этилган мутахассис умуман мамлакатга киритилмаган.