Ироқ терма жамоаси ҳужумчиси АҚШ аэропортида 7 соат давомида сўроқ қилинди

Ироқ миллий терма жамоаси ҳужумчиси Айман Ҳуссайн Жаҳон чемпионати учун АҚШга етиб боргач нохуш ҳолатга дуч келди.

Маълум қилинишича, футболчи аэропортда хавфсизлик хизматлари томонидан ушлаб турилган ва етти соат давомида сўроқ қилинган. Кейинчалик у озод қилинган.

Манбаларга кўра, Айман Ҳуссайнни террорчилик фаолиятида гумон қилинаётган бошқа бир Ироқ фуқароси билан адаштириб юборишган.

Ҳолат янада ачинарлиси, футболчининг ўзи ҳам террорчилар ҳаракатларидан жабр кўрган оиладан чиққан. 2008 йилда унинг армияда хизмат қилган отаси террорчилар томонидан ўлдирилган. 2014 йилда эса катта акаси ўғирлаб кетилган ва ҳозиргача унинг тақдири ҳақида ҳеч қандай маълумот йўқ.

Шунга қарамай, Айман Ҳуссайн ҳозирда Ироқ терма жамоаси сафида Жаҳон чемпионатида иштирок этиш учун тайёргарликни давом эттирмоқда.