Ислом Тўхтахўжаев терма жамоадаги шармандагарчилик, бизга қайси мураббий кераклиги ва "Қизилқум"га ўтишида асосий сабаб нима эканлиги ҳақида гапирди

Мавсум бошланиши олдидан “Қизилқум” ўз сафига Ислом Тўхтахўжаевни қўшиб олиши етарли даражада эътиборни тортадиган трансферга айлангани ҳеч кимга сир эмас.

Ўшанда футболчи Хитойдаги фаолиятини тугатиб яна хорижга кетиши кутилаётганди. Аммо “Қизилқум” бош мураббийи Ҳамиджон Актамов бошқаларни ортда қолдириб Тўхтахўжаевни жамоасида тўп суришга кўндира олди. Шундан бери Ислом “Қизилқум”нинг асосий ўйинчисига айланди.

Қолаверса, миллий терма жамоамиздаги фаолиятини ҳам давом эттириб келяпти. Тўхтахўжаев Sports.uz мухбири билан суҳбатда бир қатор саволларга жавоб берди.  

- “Қизилқум” жамоасининг жорий мавсумдаги иштироки кўпчиликни ёқимли маънода ажаблантирмоқда. Чунки клуб айни пайтда 4-ўринни эгаллаб турибди. Бунгача асосан ўрта поғоналарда юрган жамоанинг бу мавсумда кўтарилишга эришаётгани ажойиб. Чунки бу орқали Суперлигада яна бир рақобатбардош клуб шаклланяпти. “Қизилқум” қандай қилиб бундай кучли жамоага айланди?

- “Қизилқум” клуби билан шартнома тузганимизда бош мураббий Ҳамиджон ака Актамов юқори ўринлар учун курашиш асосий вазифа эканлигини айтган ва у киши билан шу мавзуда гаплашганмиз. Мана, ҳозир ҳам медаллар учун кураш олиб боряпмиз. Жамоада йиғилган футболчилар тажрибали. Улар билан бемалол чемпионлик учун курашиш ярашади. Ҳозирги “Қизилқум”га ўртамиёна бўлиб юриш умуман ярашмайди.

- “Қизилқум”нинг мақсади совринли ўринлардан жой олиш. Аммо рақобат кучли. Сиз эса ўйнаган клубларда албатта совринларни ютгансиз. Бу сафар “Қизилқум” билан нимадир ютишингизга қанчалик ишонасиз ва жамоангизнинг бу борадаги имкониятини қандай баҳолайсиз?

- “Қизилқум” билан бошида чемпионлик учун ҳаракат қилмоқчи эдик. Менимча, энди бу қийинроқ масала бўлиб қолди. Нимага деганда, “Пахтакор” анча олдинга ўтиб кетди. Бизнинг мақсадимиз Осиё Чемпионлар лигасига йўл олиш.

- Мавсум бошида сизнинг “Қизилқум” жамоасига ўтишингиздан кўпчилик ажабланганди. Негаки, асосан совриндор клубларда тўп суриш орқали мухлисларни ўргатиб қўйгандингиз. Бундай танловни қабул қилиш учун жиддий сабаб бўлиши керак, албатта! Бу масалада нима деган бўлардингиз?

- Жамоани танлашимни ҳам асосий сабаби, Ҳамиджон ака билан гаплашгач, “Қизилқум”нинг медаллар учун курашишига ишонч ҳосил қилдим. Кўриб турибсиз, таркибда маҳоратли ўйинчилар жамланган. Шу боис “Қизилқум” тажрибали клубга айланди. Бу бир йиллик жамоа эмас. Келаси йилларга чемпионлик учун курашадиган жамоани шакллантирмоқчи. Шу сабабли “Қизилқум” билан шартнома тузганман.

- Агар сир бўлмаса ёзги трансфер ойнаси очилган пайтда сизга қандай ва қаердан жиддий таклифлар бўлди?

- Кўп таклиф бўлмади. Менимча, четдан таклиф бор, аммо ҳали бу хусусида айтишнинг мавриди эмас. Қачонки, ҳал бўлганидан кейин гапиришим мумкин.

- Умуман олганда, яна легионер сифатида четда синаб кўриш ниятингиз борми? Айтайлик, бу сафар кучлироқ чемпионатда...ёки бу борада энди кеч деб ўйлайсизми?

- Менимча, ҳимоячи учун ҳали кеч эмас, 31 ёшдаман. Доим ҳаракатдамиз. Албатта, яхшироқ чемпионатда тўп суриш истагим йўқ эмас. Қўлни туширмаймиз ва Худодан яхши жамоаларда ўйнашни сўраб, ҳаракат қилаверамиз.

- Ҳамиджон Актамов жамоани қандай руҳлантиради: Пул биланми ёки мураббийлик салоҳияти биланми?

- Ҳамиджон ака ҳар бир футболчи билан алоҳида гаплашади. Барча билан яқин муносабатда, худди ака-укадек. Муаммоларини эшитади, ҳал қилишга ёрдам беради. Менимча, руҳлантиришда пулни алоқаси бўлмаса керак. Чунки жамоадаги ҳамма футболчи Актамов билан илиқ муносабатда. Ўртада ҳурмат ва ишонч катта. Албатта, футболчиларни руҳлантиришда Актамовнинг мураббийлик салоҳияти ҳам ўз сўзини айтади.

- Ўзбекистонлик футболчилар орасида илк бор Элдор Шомуродов Европанинг кучли бешлик чемпионатида тўп суриш орқали кўтариляпти ва “Рома”дек клубда Моуриньо қўл остида ўйнаяпти. Сиз унинг бундай даражада юқорилашини кутганмидингиз?

- Элдор учун жуда хурсандмиз ва дуодамиз. Мана шундай клубда ўйнаётгани ёқимли. Тўғрисини айтиш керак, икки йил аввал Элдор Шомуродов “Рома”да ўйнайди деса кўпчилик ишонмасди. Мана, энди у барча ёш футболчиларга тирик намуна. Ҳаммаси Аллоҳдан. Инсон фақат меҳнат қилиши керак. Европанинг кучли клубларида ўзбекистонлик футболчилар ўйнай олишини Шомуродов кўрсатиб беряпти.

- Миллий терма жамоадаги омадсизликдан кейин ўзингизга келишингиз учун қанча вақт керак бўлди?

- Тўғриси, миллий терма жамоадаги бундай шармандагарчиликдан одам ҳалигача ўзига келгани йўқ. Чунки бунақаси ҳали бўлмаганди...

- Айни пайтда миллий термамизни янги бош мураббийи ким бўлиши ҳаммани қизиқтиряпти. Шахсий фикрингиз қандай: бизга энди қандай мураббий керак? Ёки сиз кимни айтган бўлардингиз?

- Бирорта мураббийни алоҳида кўрсатиб айта олмайману, лекин Эронга Карлуш Кейруш келганида бу терма жамоа биз билан бир хил даражада эди. Кейруш кетаётганида эса Эрон Ўзбекистондан кўра икки-уч баробар кучли жамоага айланганди. Бизда ҳам мана шундай мураббий бўлса, яхши бўларди. Футболни ривожлантириш ва ўйинчиларнинг даражасини юқори кўрсатадиган мураббий бўлиши муҳим.

- Ҳимоячи сифатида сиз учун тўхтатиб қолиш қийин бўлган ҳужумчи ким?

- Ҳимоячи учун тезкор, техникаси юқори ҳужумчиларни тўхтатиб қолиш қийин. Очиғи, бу борада кимнидир алоҳида кўрсатиб бера олмайман.

- Мана, олимпиядачиларимиз ғолиб сифатида жуда чиройли кутиб олинди. Уларнинг ғалабалари футболчиларга қандай мотивация бериши мумкин?

- Олимпиячиларимиз учун жуда ҳам хурсандмиз. Уларга ҳам дуо қилиб, мухлислик қилдик. Худо хоҳласа, футболчиларни ҳам жаҳон чемпионатларида, яхши мусобақаларда мана шундай хурсандчиликда кутиб олиш насиб қилсин. Албатта, спортчиларимизнинг бундай ғалабалари нафақат биз футболчиларга, балки ёш спортчиларга ҳам катта мотивация беради.