Испания терма жамоаси ҳужумчиси расман "Ливерпуль"га ўтди

Англиянинг машҳур "Ливерпуль" клуби Испания терма жамоаси ҳужумчиси Виктор Муньосни "Осасуна" таркибидан сотиб олганини расман эълон қилди.

22 ёшли футболчи АҚШнинг Теннесси штатида жойлашган Испания терма жамоаси базасида янги жамоаси учун тиббий кўрикдан ўтди ва ўтган мавсумги Англия чемпиони билан узоқ муддатли шартнома имзолади.

Маълумотларга кўра, трансфер қиймати 40 миллион еврони ташкил этади. Бу миқдорнинг ярми "Реал" клубига ўтади. Мадрид жамоаси ўз тарбияланувчисини қайта сотиб олиш ҳуқуқига эга эди, аммо бу имкониятдан фойдаланмади.

Ўтган мавсумда Муньос "Реал"нинг иккинчи жамоасидан "Осасуна"га ўтгач, Испаниянинг олий дивизионида 34 ўйинда майдонга тушиб, 6 та гол урди ва 2 та голли пас берди. Шу натижалари орқали у 2026 йилги жаҳон чемпионати учун Испания терма жамоаси кенгайтирилган рўйхатига киришга муваффақ бўлди.