Испаниялик юлдуз 45 ёшида футбол майдонларида жавлон урмоқда

Испания миллий терма жамоасининг собиқ ўйинчиси Даниэль Гуиса 45 ёшида фаолиятини давом эттиришга қарор қилди.

Тажрибали марказий ҳужумчи Испания футболида куч жиҳатидан еттинчи лигада иштирок этувчи “Херес Индустриал” клубида тўп тепадиган бўлди. Бу ҳақда клуб матбуот хизмати хабар берди.

Дани ўтган мавсумни “Ротенья” жамоасида ўтказган эди. Жорий мавсумнинг биринчи ярмида Гуиса “Райо Санлукеньо”да ўйнади. Энди чемпионатнинг қолган қисмида ўзини тарбиялаган клубга ёрдам беришга келди.

Гуиса фаолиятини ҳали ўтган асрда — 1998 йилда бошлаган. У 2008 йилда Испания терма жамоаси таркибида Европа чемпиони бўлган. Терма жамоада жами 21 та учрашувда майдонга тушиб, олтита тўп киритган.

Фаолиятининг асосий қисмини Испаниянинг турли клубларида ўтказган. Бироқ фаолияти давомида легионер сифатида Малайзиянинг “Жохор”, Туркиянинг “Фенербаҳче” ва Парагвайнинг “Серро Портеньо” клубларида ҳам ўйнаган.