Исроил Мадримов таъзирини берган боксчи Олимпиада олтин медалини қўлга киритишига ишонмоқда

Сўнгги жаҳон чемпионатининг 75 кг вазн тоифаси финалчиси, 25 ёшли филиппинлик боксчи Эумир Марсьял профессионал рингдаги дебют жангини 16 декабрь куни AҚШда ўтказади. Тўрт раундлик жангидаги рақиби 29 ёшли америкалик Эндрю Уитфилд бўлади.

Шу йилнинг июль ойида Марсьяль Мэнни Пакьяонинг “MP Promotions” ва АҚШнинг нуфузли “Premier Boxing Champions” промоутерлик компанияси билан шартнома имзолади ва сўнгги икки ойда Лос-Aнжелесда таниқли мураббий Фредди Роуч қўл остида машғулот ўтказди. Филиппинликнинг асосий мақсади - Токиода бўлиб ўтадиган Олимпия ўйинларида олтин медални қўлга киритиш.

“Профессионал йўналишга ўтиш - бу Токио Олимпиадаси йўлидаги муҳим қадам. Мен Олимпиадада учрашишим мумкин бўлганларнинг аксарияти аллақачон профессионал фаолиятини олиб бормоқда, шунинг учун Фредди Роуч билан ўтказган тайёргарлигим улар билан Олимпиадада рақобатлаша олиш тажрибасини беради. Aммо менинг асосий мақсадим ҳар доим отамнинг орзусини бажаришдир. У менинг биринчи ҳаваскор жангимдан буён Олимпиадада олтин медални қўлга киритишимни орзу қилган. Мен Филиппинга биринчи бўлиб Олимпиаданинг олтин медалини тақдим этмоқчиман", - дея филиппинликнинг сўзларини келтиради “The Ring”.

Маълумот учун, 2018 йилги Осиё ўйинлари ярим финали ҳамда 2017 йилги Осиё чемпионати чорак финалида Исроил Мадримов филиппинлик боксчига ҳеч қандай имконият қолдирмаганди. Шунингдек, Шаҳрам Ғиёсов ҳам 2016 йилги Осиё-Океания минтақасининг Олимпиадага саралаш турнирида Эумирни мағлубиятга учратган эди.