Жаъфар Ирисметов ОЧЛнинг илк туридаги ўйинлар олдидан клубларимиз имкониятини қандай баҳолади?

Осиё Чемпионлар лигасининг янги мавсуми ҳам старт олиш арафасида. Хабарингиз бор, тўртта жамоамиз – “Пахтакор”, “Насаф”, “Навбаҳор” ва ОКМК клублари гуруҳ босқичида иштирок этадилар ва 18-19 сентябрь кунлари илк учрашувлариин ўтказадилар.

Таниқли мутахассислардан бири Жаъфар Ирисметов клубларимиз ОЧЛдаги илк тур ўйинлари олдидан имкониятларини баҳолади.

“Пахтакор” – “Ал-Айн”

- “Пахтакор” ўз майдонида ўйнаши эвазига мезбонларда бироз ташаббус бўлиши мумкин. Аммо “Пахтакор”ни ҳозирги ҳолатидан келиб чиқиб, бу учрашувга 50х50 сифатида баҳо берган бўлардим. “Ал-Айн”ни жуда яхши билмайман. Боз устига ҳозирги пайтда БАА клублари кучли ўйинчиларни харид қилишмаяпти. Ўйлашимча, бўлажак учрашувда дуранг бўлишининг эҳтимоли катта.

“Ал-Ҳилол” – “Навбаҳор”

- Бу ерда “Ал-Ҳилол”нинг имконияти кўпроқ, балки жуда ҳам кўпроқ десак бўлади. “Навбаҳор” футболчиларини терма жамоа билан бирга сафарга бориб келиб, соат вақтлари алмашганини ҳисобга олсак, бу клубнинг имкониятлари камроқ. Аммо ўйлашимча, “Навбаҳор” тўғри йўналишда ўйин кўрсата олса, балки нимадир бўлар. Лекин тан олиш керакки, бўлажак тўқнашувда “Ал-Ҳилол”нинг имконияти катта. Улар харид қилган юлдузлар жамоа ўйинини “очяпти”. Билмадим, Неймар ўйнайдими-йўқми?!

“Ал-Иттиҳод” – ОКМК

- ОКМК сафида терма жамоага камроқ футболчилар борган. Шуни ҳисобга олсак, олмалиқликларда яхшироқ имконият бўлиши мумкин. Лекин, барибир “Ал-Иттиҳод”ни ўз уйида ўйнаётганини ҳисобга олсак, менимча уларнинг қўли баланд келади. Албатта, футболда ҳамма нарса бўлиши мумкин.

“Ал-Файсали” – “Насаф”

- Тўғриси, Иордания жамоасини билмайман. Лекин билганим шуки, Иордания жамоалари курашувчан. Шу боис “Насаф”га ҳам осон бўлади, деб ҳисобламайман. Аммо бу жуфтликда “Насаф”нинг имкониятини юқорироқ баҳолаган бўлардим. Чунки жамоада Осиё Чемпионлар лигасида қатнашиш тажрибаси бор. Футболчилари ҳам яхши спорт формасида. Худо хоҳласа, “Насаф”нинг қўли баланд келади, деб ўйлайман.

Шуҳратбек Жўраев.