Жаҳон чемпионатига бормасам бормасман, лекин “Барса”дан кетмайман!

“Барселона” асосий таркибидаги жойини йўқотган дарвозабон Марк-Андре тер Штеген жаҳон чемпионатида иштирок илинжида Каталония клубини тарк этмаслигини билдирди.

Гап шундаки, Ханс-Дитер Флик “Барселона”ни қабул қилиб олганидан кейин жамоа сардори тер Штегеннинг ишлари юришмай қолди. Қўшимчасига оғир жароҳат унинг фаолиятини издан чиқарди.

Агар 33 ёшли посбон мунтазам ўйин амалиётига эга бўлмаса, Германия терма жамоаси сафида 2026 йилги жаҳон чемпионатида иштирок эта олмайди.  

Бироқ  тер Штеген мундиалда қатнашиш ғоясига қаттиқ боғланиб қолмаган, У агар ўз даражасига мос жозибали таклифлар бўлмаса, ҳатто захирада қолиб кетса ҳам “Барселона”дан кетмоқчи эмас.

Бу ҳақда журналист Адриа Альбетс хабар берди.

Ҳозирча, Марк-Андре тер Штегенни қониқтирадиган таклиф тушгани йўқ. Тажрибали посбон декабрь ойида умуртқа жароҳатидан сўнг сафга қайтганди.