Жамоасини АПЛга олиб чиққан мураббий фаолиятини тўхтатди

"Ипсвич Таун" бош мураббийи Киран Маккена мураббийлик фаолиятида танаффус олишга қарор қилди ва клубни тарк этди. Бу ҳақда жамоа матбуот хизмати маълум қилди.

40 ёшли мутахассис сўнгги беш йил давомида "Ипсвич"да фаолият юритди. Унинг қўл остида жамоа Англия Премьер-лигасига йўл олган, кейин эса яна қуйи дивизионга тушиб кетган эди. Бу гал яна кучлилар сафига қайтди. 

Маккена 2015–2018 йилларда "Тоттенхэм" тизимида, 2018–2021 йилларда эса "Манчестер Юнайтед" клубида мураббий сифатида ишлаган.

Аввалроқ оммавий ахборот воситаларида айнан Киран Маккена "Фулхэм"нинг янги бош мураббийлигига асосий номзод сифатида тилга олинаётгани ҳақида хабарлар тарқалган эди. Бу гап-сўзлар "Фулхэм"ни португалиялик мутахассис Марку Силва тарк этганидан кейин янада кучайди. 

Эслатиб ўтамиз, "Ипсвич" ўтган мавсум Чемпионшип мусобақасини иккинчи ўринда якунлаб, атиги бир мавсумлик танаффусдан сўнг яна Премьер-лигага қайтди.