Жамшид Искандеров нега Ўзбекистон терма жамоасига керак?

19 сентябрь куни Ўзбекистон миллий терма жамоаси навбатдаги ўқув-машғулот йиғинларини бошлайди. Йиғиннинг дастлабки куни Тошкентда ўтади, кейин жамоамиз Камерун ва Коста-Рика терма жамоалари билан ўртоқлик учрашувларида иштирок этиш учун Корея Республикасига йўл олади.

Миллий терма жамоамиз бош мураббийи Сречко Катанец мазкур йиғинларга жалб этилган футболчиларининг кенгайтирилган рўйхатини эълон қилди.

Терма жамоа еткачиларидан бири Жалолиддин Машарипов ҳозирда жароҳатдан тикланиш даврини ўтказмоқда. "Ал-Насср" клубининг мурожаатига асосан футболчимиз ушбу йиғинни ўтказиб юборадиган бўлди.

Натижага мураббий жавоб беради. Лекин доим терма жамоа таркиби муҳокама қилинади. Чунки биз на Осиё чемпиони бўлганмиз, на жаҳон чемпионатига чиққанмиз. Агар мураббий қандайдир соврин ютганда эди, майли қайси футболчиларни чақирса ҳам натижа қиляптику деймиз. Бироқ ундай бўлмаяптику. 

Шунинг учун таркиблар борасида гап кетганда, ўз фикрларимизни билдирмасликнинг иложи йўқ. 

Ўзбекистон миллий терма жамоасининг кенгайтирилган таркиби эълон қилинганида кўпчилик қатори менда ҳам саволлар пайдо бўлди. Кўпчилик Жамшид Искандеровни кутганди, бу гал таркибга жалб қилинишини. Бироқ Катанец анча вақт трансфер муаммоси билан банд бўлиб, майдонга тушмай қўйган Остон Ўруновни маъқул кўрди. Мураббий қайси сабабларга кўра Искандеровни чақирмагани шахсан мен учун қизиқ. Чунки терма жамоамиз рақиблар билан қийналаётгани бор гап. Ҳатто оддий жамоалар билан ҳам. Шундай паллада “креатив” Жамшид Искандеров жуда керак бўларди. Унинг майдонни кўра олиши билан бошқалардан яққол ажралиб турибди.

Шаҳбоз Умаров “Ордабаси”дан таклиф қилинди. Гарчи у ўз клубида ўзини кўрсата олмаётган бўлса ҳам. Унинг ўрнига Суперлигадан вариант йўқ эмасди. Жамшид Болтабоев ярим ҳимоя, чап томон ҳимоясида ва ҳужумни якунловчи позицияларда ўйнай оладиган универсал футболчи. У “Навбаҳор”нинг ғалабаларида муҳим ўрин тутмоқда.

Ҳимояни яхши кўрадиган мураббий бу позицияга яхши номларни танлаган, бунга шубҳа йўқ. Лекин яна бир футболчи борки, Катанецнинг эътиборидан четда қолгандек. У ҳам бўлса Даврон Ҳошимов. Агар Ҳошимов Вадим Абрамовнинг услубига, тактикасига тўғри келмайди дейишса ишонаман. Лекин Сречко жаноблари ўз услубига мос бўлган жангчини бир синаб кўрмаётгани қизиқ.

Ҳужумда ҳам вариантлар етарли. Темурхўжа Абдухолиқов ва Шоҳруз Норхонов тўпурарлик маҳоратини намойиш этиб, яхши формада. Аммо жамоа сардори Элдор Шомуродов эканлигидан келиб чиқсак, мураббий ҳужумга яна бошқаларни синаб кўргандан кўра, бошқа чизиқларни ўйлаётган бўлиши мумкин.

Ўзи Сречко Катанец юртимизга келганида ҳамма стадионларга бориб кўриб, ўрганиб чиққанди. Аммо ҳозир Суперлигадаги маркабий беллашувларда деярли кўриниш бермаяпти. Ҳозир ҳамма ўйин трансляция қилинаётгани учун видеолардан хулосага келаётгандир. Лекин бу тўғри йўл эмас. Жонли кўриб, кадрга тушмаган ҳолатлар орқали футболчиларни ажратиб олса мақсадга мувофиқ бўлади.

Биласизми, нега Франция терма жамоаси ҳар қандай мусобақада фаворит саналмоқда? Чунки барча позициясида 3 тадан футболчи бор. Сариқ карточко ёки қайсидир футболчи жароҳат олса унинг ўрни бемалол тўлдириб кетилади. Масалан, марказий ҳимоячи қанотга ўтсин деган гап йўқ. 

Албатта, биз юқорида айтган футболчилар тўп тепадиган позицияларда бошқалар чақирилган. Аммо формада бўлиб турганларни термада синаб кўриш зарар қилмайди.

Бекзод ИСАЕВ