Жасур Абдураимов футболчиларнинг жисмоний ҳолатини яхшилашда икки карра жаҳон чемпионининг хизматидан фойдаланяпти

Мамлакат миллий чемпионати баҳсларига тайёргарлик кўраётган Бекободнинг "Металлург"  жамоасида машғулотларнинг иккинчи цикли бошланди.

ФИФА кунлари муносабати билан юзага келган танаффусдан "Металлург" биринчилардан бўлиб машғулотларга қайтганлиги ҳақида муқаддам хабар бергандик. Машғулотларнинг биринчи ҳафтаси мураббийлар штаби футболчиларнинг функционал, жисмоний тайёргарлигига жиддий эътибор қаратишди. Боиси ортда қолган турлар давомида футболчиларнинг айнан жисмоний ҳолати, тез толиқиб қолишлари, захира ўриндиғининг торлиги Жасур Абдураимовни қийнаганди.

Шу боис Жасур Берадорович бу галги йиғинга ўзгача ёндашди. Футболчиларнинг жисмоний ҳолатини оширишда экстремал спорт турлари ва баҳодирлар ўйини бўйича 46 карра Ўзбекистон чемпиони, Осиёнинг мутлоқ чемпиони, икки карра жаҳон чемпиони, Арнольд классик спорт мусобақалари ғолиби Сергей Трубицинни ёрдамга жалб этди. Ўзбекистонннинг энг кучли ва баҳодири ўзининг тажрибаси ҳамда билими билан футболчиларнинг машғулотларига ранг-баранглик бағишлаяпти.

Бекобод шаҳрида давом этаётган машғулотлар ҳар куни икки маҳалдан олиб бориляпти. Куннинг биринчи ярмида футболчилар жисмоний тайёргарликни тиклаш марказида фитнесс билан машғул бўлишяпти. Куннинг иккинчи ярмида эса жамоа "Металлург"  марказий стадионида кўпроқ тўп билан ишлаяпти. Бунда асосий эътибор жамоа ўйинини шакллантириш, тўп билан ишлаш, турли ўйин вазиятларини ишлаб чиқиш, комбинацияларни мукаммаллаштиришга қаратилмоқда.

“Металлург” матбуот хизмати.