Жавоҳир Қаҳрамонов: "Клубда чемпионлик учун ҳамма нарса бор, янада кучлироқ "Нефтчи"ни кўрасизлар"

Бир неча йилни Жиззахнинг “Сўғдиёна”сида ўтказган ярим ҳимоячи Жавоҳир Қаҳрамонов у ерда охирги пайтларда жамоа сардори сифатида тўп сурди. Бу йил эса “Нефтчи” шарафини ҳимоя қиладиган бўлди. Бу хусусида футболчи Sports.uz сайтига интервью берди.

- Жавоҳир, "Нефтчи" клубига кўчиб ўтдингиз. Бу қарорингиз фаолиятингизда нимани ўзгартиради, деб ўйлайсиз?

- Тўғриси, “Нефтчи”га ўтганимдан хурсандман. Бу жамоа билан насиб қилса, юқори ўринларни олишни истайман.

- Бир неча йил мобайнида "Сўғдиёна" учун ўйнадингиз. У ерда кумуш медални қўлга киритганингиз энг яхши натижангиз бўлса керак ва ОФК Кубогида ҳам иштирок этдингиз. Сиз бундан ортиғини кутмаган бўлсангиз керак, нима дея оласиз?

- Ҳа, “Сўғдиёна”да зўр даврлар ўтказдик. Фақат 2023 йилда нимадирлар ўхшамади. Жамоа мухлислари ҳамда раҳбариятига раҳмат айтиб қоламан ва уларга омад тилайман.

- Умуман айтганда, "Сўғдиёна"дан нима учун кетдингиз? Ёки узоқ йил бир жойда ўйнаб зерикдингизми?

- Тўғрисини айтсам, бошқа клубда ўзимни яна бир бор синаб кўргим келди. Шу боис ўзгартиришга қарор қилдим.

- “Сўғдиёна” бош мураббийи Иван Бошкович билан "Нефтчи" устози Виталий Левченко ўртасида қандай фарқ бор?

- Иван Бошкович яхши мураббий. Албатта, унга ҳам миннатдорлик билдираман. Виталий Левченко ҳам жуда тажрибали. Аммо уларнинг фарқини ҳали унчалик яхши билмайман. “Нефтчи”га тез орада қўшиламан.

- Сир бўлмаса, олдингизда яна қандай таклифлар бор эди? Билишимча, четга легионер бўлиб кетишингиз ҳам мумкин эди. Нега бу имкониятдан фойдаланмадингиз?

- Ҳа, вариантлар чиқди. Лекин Ўзбекистондан ҳам яхши таклиф бўлгани учун “Нефтчи”ни танладим.

- "Нефтчи" чемпионлик учун курашяпти. "Пахтакор"дан чемпионликни тортиб олишига қанчалик ишоняпсиз?

- “Нефтчи” клубида чемпионлик учун ҳамма нарса бор. Насиб қилса, янги мавсумда янада кучлироқ “Нефтчи”ни кўрасизлар.

- Қайси рақамни танладингиз ва сиздан катта натижаларни кутаётган фарғоналик мухлисларга нима деган бўлардингиз?

- Ҳали рақам танламадим. Янги йил байрами билан ҳаммани табриклайман. Мухлисларимизга янги йилда омад тилайман. Худо хоҳласа, барчаси яхши бўлади.

Шуҳратбек Жўраев.