JBKAнинг бош мақсади - белбоғли курашни Олимпия ўйинлари дастурига киритиш

Ўзида мардлик, ҳалоллик, жасурлик каби фазилатларни жамлаган миллий спорт туримиз белбоғли курашни дунё миқёсида ривожлантириш мақсадида 2021 йил 27 сентябрда Литванинг Вильнюс шаҳрида Жаҳон белбоғли кураш ассоциацияси (JBKA) ташкил этилди ва мазкур ассоциацияга ўзбекистонлик Азизбек Ғаниев президент этиб сайланди.

JBKA кейинроқ Европа Иттифоқидан рўйхатдан ўтказилди. Ассоциация тузилгач, белбоғли курашга бўлган эътибор янада кучайди. Қисқа фурсат ичида белбоғли кураш бўйича Европа, Пан Америка ҳамда Осиё конфедерациялари ташкил этилди.

JBKA ташаббуси билан сўнгги бир йилда, аниқроғи, ўтган йили ноябрь ойида Жиззах ва жорий йил май ойида Қўқон шаҳарларида Ўзбекистон Республикаси Президенти соврини учун ёшлар ўртасида жаҳон чемпионатлари юқори савияда ташкил этилгани белбоғли кураш курраи заминимиз бўйлаб оммалашаётганидан дарак беради.

Яна бир муҳим жиҳат, бундай нуфузли мусобақаларнинг юртимизда ўтказилиши ёшларнинг белбоғли кураш билан шуғулланиши янада ортиши (ҳозирги пайтда шуғулланувчилар сони 36 мингдан ортиқ), туризмнинг мамлакатимизда кенг ривожланишига ҳисса қўшиши бор гап. Бунинг яққол исботи сифатида жорий йил 8-11 сентябрь кунлари Ўзбекистон Республикаси Президенти соврини учун Наманган шаҳрида илк бор белбоғли кураш бўйича эркаклар ва аёллар ўртасида ўтказилган жаҳон чемпионатини айтишимиз мумкин.

Наманган шаҳридаги “Баркамол авлод” спорт мажмуасида ўтказилган мазкур жаҳон чемпионатида Грузия, Беларус, Белгия, Эрон, АҚШ, Исроил, Россия, Руминия, Покистон, Италия, Туркия, Камерун, Швеция, Молдова, Ҳиндистон, Мўғулистон, Латвия, Эстония, Қозоғистон каби давлатлардан 500 нафардан ортиқ спортчи иштирок этди. Мусобақа доирасида меҳмонлар Тошкент ва Наманган шаҳрининг диққатга сазовор жойларини томоша қилишди. Қувонарли жиҳати, спортчилардан иборат ушбу меҳмонларнинг кўпчилиги юртимизга яна сайёҳ сифатида келиш истагини билдиришди. Таъкидлаш жоиз, белбоғли кураш бўйича ўтказилган ўсмирлар, ёшлар ва катталар ўртасида жаҳон чемпионатлари туризм ривожи учун ҳам хизмат қилди.

Маълумот учун, жаҳон чемпионатида белбоғли кураш бўйича эркаклар -57, -62, -68, -75, -82, -90, -100, +100 кг. вазн тоифаларида куч синашган бўлишса, аёллар -52, -58, -66, -76, +76 кг. вазнларда ғолиблик учун баҳс олиб боришди.

Миллий спортимиз белбоғли курашни Европа ва Осиё ўйинлари, қолаверса, Олимпия ўйинлари оиласига киритиш JBKAнинг бош мақсади саналади. Бунинг учун ассоциация томонидан узоқ йиллик пухта истиқболли дастурлар ишлаб чиқилмоқда.