ЖЧ–2026 учун янги қоидалар жорий этилди

ФИФА 2026 йилги Жаҳон чемпионати олдидан ўйинни тезлаштириш ва вақт чўзиш ҳолатларини камайтириш мақсадида бир қатор янги қоидаларни тасдиқлади.

Қоидаларга кўра, бир нечта муҳим ўзгаришлар жорий этилмоқда.

Алмаштирилган футболчи майдонни тарк этиш учун 10 сония вақтга эга бўлади. Агар у бундан кўпроқ вақт сарфласа, унинг ўрнига тушадиган футболчи майдонга кириш учун 1 дақиқа кутишига тўғри келади.

Аут учун 5 сониялик ҳисоб жорий этилади. Агар тўп белгиланган вақт ичида ўйинга киритилмаса, тўп рақиб жамоага берилади.

Майдонда тиббий ёрдам олган футболчи ўйин қайта бошланганидан кейин майдонни тарк этади ва камида 1 дақиқа ўтгачгина яна майдонга қайтиши мумкин.

"VAR" тизими эндиликда иккинчи сариқ карточка эпизодлари ва бурчак тўпи билан боғлиқ қарорларни ҳам текшириши мумкин, агар ҳакам аниқ хато қилган бўлса.