ЖЧ-2022. Англия - Франция: "Финал олди финал" учун махсус ПРЕВЬЮ!

Бугун тунги соат 00:00да мухлис ва мутахассисларни жиддий учрашув кутяпти. Жаҳон чемпионати чорак финал босқичидан ўрин олган Англия - Франция терма жамоалари ўртасида ажойиб баҳс бўлиб ўтади. Ҳақиқий классик тўқнашув. Икки жамоа ҳам ҳозирда шиддатли ўйинлар кўрсатаётганини инобатга олсак, тўқнашув ҳақида аниқ бир нима деб бўлмаслиги унга ўзгача жозиба бағишлайди.

Бу баҳс ғолиби Марокаш - Португалия ўйини ғолиби билан финал йўлланмаси учун куч синашади. 

Европанинг икки грандлари ўртасидаги супер жангни ўтказиб юбориш тўғри бўлмаса керак. Бугун тунда кўпчиликнинг бор эътибори мана шу ўйинга қаратилиши кутилмоқда.

Англия

Инглизлар мундиални ажойиб тарзда бошлади. Гуруҳ босқичида жамоа 7 очко билан биринчи ўрин сифатида плей-оффга йўлланма олди. Икки ўйинда дарвозаси даҳлсизлигини сақлаб қолди. Шунингдек, "уч шерлар" гуруҳ босқичида энг кўп гол уришга ҳам муваффақ бўлди.

Нимчорак финалда Сенегал терма жамоаси қийинчиликсиз мағлуб этилди - 3:0. Кўринишидан, Саутгейт шогирдлари мундиалдаги энг яхши жамоадек. Бироқ рақиб ҳам анойилардан эмас. Улар бугун амалдаги Жаҳон чемпионларига қарши майдонга тушади. Шунинг ўзи нариги томон учун тариф беришда етарли бўлса керак. 

Франция

"Хўрозлар" мусобақани 2 ғалаба билан бошлади ва биринчи бўлиб гуруҳдан чиқиш масаласини ҳал қилди. 3-турда Тунисга қарши асосий таркибга дам олиш имкони берилди ва жамоа шу ўйинда мағлубиятга учради. 

Нимчорак финалда Дешам шогирдлари Польша терма жамоасига раҳм қилиб ўтирмади - 4:1. Мбаппенинг ажойиб формада экани, Гризманнинг ўта фаол ҳаракатланаётгани, футболчиларнинг чизиқларда тартиб билан ўйин намойиш этаётганини инобатга олсак, французлар бу баҳс олдидан мундиал асосий фаворитларидан бири сифатида қараб келинмоқда.

Учрашувлар тарихи

Ўйинлар сони: 31 тa

Англия: 17 ғалаба

Франция: 9 ғaлaбa

Дуранг: 5 тa

Тўплар фарқи: 69 - 39, Англия фойдасига. 

Тахминий таркиблар

Англия : Пикфорд; Шоу, Магуайр, Стоунз, Уокер, Триппьер; Фоден, Райс, Беллингем, Сака; Кейн. 

Франция : Льорис; Эрнандес, Упамекано, Варан, Кюнде; Рабьо, Тчуамени, Гризманн; Мбаппе, Жиру, Дембеле.

Англияга оид янгиликлар

Англияликлар таркибида Бенжамин Уайт жамоасига ёрдам бера олмайди. У терма қароргоҳини айрим сабаблрага кўра тарк этган. Шунингдек, Раҳим Стерлингнинг ўйинда иштирок этиши сўроқ остида.

Францияга оид янгиликлар

"Уч ранглилар" сафида Карим Бензема мусобақа бошланишидан олдин жароҳат олиб, мундиални ўтказиб юбориши маълум бўлганди. Қолаверса, Люка Эрнандес жароҳат олгани боис бугунги баҳсни майдон ташқарисидан кузатишга мажбур.

Мураббийлар фикри

Гарет Саутгейт:

"Биз Франциянинг барча ўйинларини кўриб чиқдик. Шунингдек, ўз ўйинимизни ҳам таҳлил қилдик. Айниқса, охирги Сенегалга қарши баҳсда жиддий баҳс-мунозарага киришдик.

Пикфорд бугун асосий таркибда ўйинни бошлайди. Сабаби, у АҚШ, Уэльс ва Сенегалга қарши ўтказган "қуруқ ўйин"ларидан сўнг шунга муносиб. У пенальтилар сериясига ҳам тайёргарлик кўрмоқда. 

Унинг айтишича, "Adidas" томонидан ишлаб чиқарилган "Al Rihla" тўплари унга ноқулайлик туғдирмоқда. Чунки АПЛда бундай кўринишдаги тўплардан фойдаланилмайди".

Дидье Дешам:

“Англияда қандайдир заиф нуқта кўрмаяпман. Ҳамма жамоанинг кучли томонлари бўлади. Бироқ ҳаммасида ҳам ожиз нуқталар бўлавермайди. 

Мен Саутгейтни ҳурмат қиламан! Биз кам кўришганмиз, озгина бўлса-да суҳбатлашганмиз. Агар тўғри тушунган бўлсам, уни ўз мамлакатида барча ҳам ҳурмат қилавермайди.

Шунга қарамай, у жуда яхши мураббий. Гарет охирги йилларда Англияни яхши натижалар сари етакламоқда. У кўпроқ қадрланишга лойиқ бўлган мутахассис".

Шоҳрух Зоиров тайёрлади.