ЖЧ-2022 стартига 22 кун қолди! Гол машинасига эга, кўплаб номдор юлзузлари бўлган, қисман омад туфайли ЖЧ-2022га чиққан Польша термаси ҳақида

ЖЧ-2022 стартига тобора оз вақт қолмоқда. Тарихда илк бор мундиал араб диёрида ва иккинчи маротаба Осиёда ўтказилмоқда. (2002 йилда Япония ҳамда Жанубий Корея турнирга мезбонлик қилган)

Мазкур турнирнинг бир қатор ўзига хос жиҳатлари мавжуд. Жумладан, куз ойининг охири ва қишнинг аввалида ўтказилиши ҳам қисман футбол мухлислари учун бир янгилик. Сабаби, биз кўриб ўрганиб қолган мундиаллар доим ёзда ўтказиб келинган.

Қайси терма жамоалар ЖЧ-2022да иштирок этишини яхши биласиз. Агар ҳамон бундан хабардор бўлмасангиз яна бир бор эслатиб ўтиб кетамиз.

Мундиал стартига 22 кун қолган ва биз кетма-кетликда термалар билан сизни таништириб келяпмиз. Демак, "C" гуруҳи вакили ва супер страйкерига эга Польша терма жамоаси билан ўзига хос "челленж"имизни давом эттирамиз.

Польша терма жамоаси. Польша футбол федерацияси (PZPN)

Ташкил топган: 1919 йил (ФИФА'га 1923 йилда аъзо бўлган)
Бош мураббий: Чеслаб Михневич
Жамоа сардори: Роберт Левандовски
Терма тўпурари: Роберт Левандовски (76 та гол)

Илк расмий баҳси: Венгрия - Польша 1:0 (1921 йил)
Энг йирик ғалаба: Польша - Сан-Марино 10:0 (2009 йил)
Энг йирик мағлубият: Дания - Польша 8:0 (1948 йил)

Айни дам мазкур терма жамоа FIFA рейтингида 26-ўринни банд этиб турибди. Уларнинг рейтингда энг юқори кўрсаткичи 5-ўрин, энг пасти эса 78-поғонани ташкил қилади.

Ушбу юрт термаси бунга қадар ўтказилган Жаҳон Чемпионатларида 7 маротаба иштирок этган. Шунингдек, улар 1974 ҳамда 1982 йилларда Мундиал бронза медалига эга чиққан.

Турниргача босиб ўтилган йўл

Польша ЖЧ-2022 йўлланмаси учун Англия, Албания, Венгрия, Андорра ҳамда Сан-Марино каби терма жамоалар билан бир гуруҳда кураш олиб борди. Польша "I" гуруҳида 20 очко билан Англиядан (26) кейинги иккинчи ўринни қўлга киритди. Биласиз, Европада фақатгина ўз гуруҳида биринчи ўринни банд этган терма тўғридан-тўғри Мундиалга йўл олади. Иккинчи ўрин соҳиблари эса плей-оффда ўзаро қолган 3 йўлланма учун кураш олиб боради.

Саралашнинг ярим финалида Швецияни 2:0 ҳисобида таслим этган польяклар ЖЧ-2022 йўлида Россия билан кураш олиб бориши керак эди. Бироқ кейин нима бўлганини ўзингиз яхши биласиз. Русларга нисбатан қўлланилган санкциялар туфайли Левандовски бошчилигидаги терма осонлик билан Мундиалга йўлланма қўлга киритди.

Наздимда, ЖЧ-2018 мезбонлари билан бекор қилинган баҳс ўтказилганда ҳам Польшанинг ғалабага имкониятлари юқорироқ бўларди. Сабаби, бу икки терма сафидаги юлдузлари ўртасида фарқ катта, аниқроғи, "оқ бургутлар" сафида натижага бир ўзи таъсир ўтказа оладиган футболчилар мавжуд.

Шунингдек, улар саралашдан сўнг Миллатлар лигаси турнирида ҳам иштирок этиб, бироз қониқарсиз натижа қайд этди. Нидерландия, Бельгия ҳамда Уельс билан бир квартетдан жой олган Михневич шогирдлари 7 очко тўплаган ҳолда, ўз гуруҳида 3-ўринни қўлга киритди.

Таркиб

Польша терм жамоаси Левандовски, Зелиньский, Кэш, Шенсний, Глик, Милик, Залевский, Беднарек, Жирковский ва яна кўплаб Европанинг гранд клубларида тўп тепувчи таниқли футболчиларга эга. Жумладан, ҳужум марказида ҳаракат қилувчи Роберт Левандовски айни дамда замонамизнинг энг яхши голеадорларидан бири сифатида кўплаб ютуқларга эришиб келяпти.

Таркибдаги ўйинчиларнинг умумий қиймати 245 миллион еврони ташкил қилади.

Эслатма: Ушбу миқдор сўнгги йиғинга чақирилган футболчиларнинг трансфер нархига кўра, ҳисобланган. Мундиалга чақирилган ўйинчилар номи ҳали маълум эмас.

ЖЧ-2022'даги тақвими

Польша ЖЧ-2022'да Аргентина, Мексика ҳамда Саудия Арабистони терма жамоалари билан биргаликда "B" гуруҳида кейинги босқич йўлланмаси учун кураш олиб боради. 

22 ноябрь

21:00 Мексика - Польша

26 ноябрь

18:00 Польша - Саудия Арабистони

1 декабрь

00:00 Польша - Аргентина