ЖЧ-2026 очилиш ўйини бекор қилиниши мумкин

Мехикода жойлашган "Ацтека" стадиони бош дарвозаси жаҳон чемпионати–2026 очилиш ўйинига икки кун қолганда минглаб норозилар томонидан тўсиб қўйилди.

Намойишлар ўқитувчилар касаба уюшмасининг мухолиф қаноти – CNTE гуруҳи томонидан уюштирилмоқда. Улар маошларни ошириш ва пенсия ислоҳотини бекор қилишни талаб қилмоқда. Норозилик акциялари ўтган ҳафтадан бери тўхтовсиз давом этяпти.

"Биз стадионгача етиб боришни истаймиз. Ҳукумат маълум жавоблар берди, лекин улар биз учун қониқарли эмас", – дея таъкидлаган Анхель Вильялобос AFP агентлигига берган изҳоротига кўра.

"Кураш давом этади", – деб қўшимча қилган бошқа намойишчи Аустреберто Флорес.

Ҳукумат тартибни сақлаш учун стадион атрофига минглаб полиция ходимларини жалб этди, йўллар бўйлаб бетон тўсиқлар ўрнатилди. Норозилар шунингдек, мухлислар учун фан-зона ташкил этилган марказий майдон – Сокало яқинида ҳам лагер тикишган. Янги йирик акцияни ўтказиш пайшанба кунига, яъни очилиш ўйини бўладиган кунга белгиланган.

Мексика президенти Клаудия Шейнбаум норозилик намойишларини "провокация" деб атади ва кўчаларни тўсиш ҳамда жаҳон чемпионати билан боғлиқ ҳайкалларни вайрон қилиш ҳолатларини қоралади. Шу билан бирга, у намойишчиларни куч ишлатиб тарқатиш эҳтимолини рад этди.

"Мен жаҳон чемпионати очилишининг байрамона тадбирлари тинч ва осойишта ўтади, деб кафолат бераман", – деди Шейнбаум.