К-1 бўйича очиқ Осиё чемпионатида яккакурашимиз намояндалари жанг қилади.

Пойтахтимизда 20-22 сентябрь кунлари K-1 бўйича очиқ Осиё чемпионати бўлиб ўтади. Мазкур қитъа биринчилиги Ўзбекистон жисмоний тарбия ва спорт вазирлиги, Ўзбекистон ҳаваскор ҳамда профессионал K-1 федерацияси, Шарқ яккакурашлари ва жанг санъатини ривожлантириш маркази томонидан ташкил этилмоқда. Мазкур турнир тарихига эътибор қаратсак, дастлабкиси, 2012 йилда айнан юртимизда бўлиб ўтган. Шу кунга қадар мамлакатимиз ушбу мусобақага уч бора мезбонлик қилган.

Ўзбекистон ҳаваскор ҳамда профессионал K-1 федерацияси президенти Жасур Немаътовнинг таъкидлашича, очиқ Осиё чемпионати ҳаваскор ҳамда профессионал йўналишларда бўлиб ўтади. Қолаверса, ушбу турнирда асосан ҳуқуқни ҳимоя қилиш органларида фаолият олиб борадиган спортчилар иштирок этади. Ҳаваскорлар 20 сентябрдан жангга киришади. Шу куни чемпионатнинг расмий очилиш маросими ҳам ўрин олган. 22 сентябрь куни эса профессионаллар рингга кўтарилади.

Профи йўналишда 12 та жанг ўтказилиши кўзда тутилган. Ҳориждан 300 дан ортиқ мехмонлар келиши кутилмоқда. Мазкур қитъа чемпионатига бўлган қизиқиш юқори. Чунки, профессионал йўналишда юртимизнинг номдор жангчилари рингга кўтарилади. Жумладан, мутлоқ жаҳон чемпиони Бобур Ҳамдамов, яккакураш турларининг бир нечта йўналишида жаҳон чемпиони, юртимиз ММА оламининг энг машҳур вакили Мурод Хонтўраев, қўл жанги бўйича жаҳон чемпионати совриндори, R-1 йўналишида чемпионлик камари соҳиби, қўл жанги бўйича очиқ Европа чемпионати ғолиби Муса Маметовларни айтиб ўтишимиз мумкин.

Мусобақага оид қайноқ янгиликларни биз билан кузатишингиз мумкин.