Кабо-Верде дарвозабони: "Бутун жамоамиз ажойиб ўйин кўрсатди"

Испания ва Кабо-Верде ўртасидаги учрашувнинг қаҳрамонига айланган Возинья баҳсдан кейин ўз фикрлари билан ўртоқлашди.

"Бутун жамоамиз ажойиб ўйин кўрсатди. Биз бу натижа учун жуда кўп меҳнат қилдик. Испания терма жамоасига қарши баҳс осон кечмаслигини яхши билардик. Мен бутун умрим давомида Жаҳон чемпионатида ўйнашни орзу қилганман. Бизга қўллаб-қувватлов кўрсатган барча мухлисларимизга миннатдорчилик билдираман", — деди дарвозабон.

Маълумот учун, Португалиянинг иккинчи дивизионида тўп тепаётган 40 ёшли голкипер мазкур баҳсда 7 та сейв амалга оширди. Кабо-Верде кейинги турда Уругвайга қарши майдонга тушади.