Каннаваро Конгодан учралган мағлубиятга изоҳ берди

Ўзбекистон терма жамоаси Жаҳон чемпионатининг сўнгги 3-тури доирасида Конгога қарши майдонга тушиб, 3:1 ҳисобида мағлубиятга учради. Учрашувдан сўнг бош мураббий Фабио Каннаваро ўз фикрлари билан ўртоқлашди.

"Биринчи бўлимда жуда кўп энергия сарфладик. Бугунгача жисмоний тайёргарлигимиз яхши эди, бугун ҳам шу жиҳатдан яхши ҳаракат қилдик. Рақибимиз ҳам жисмоний томонлама яхши шаклланган жамоа эканлигини кўрсатди.

Ўйиндан олдин тўпни назорат қилмасак, қийин бўлишини билардик. Иккинчи бўлимда эса хатоларга йўл қўйдик ва шу сабабли голлар ўтказиб юбордик.

Биринчи таймни жуда яхши бошладик ва кўплаб имкониятлар яратдик. Аммо иккинчи бўлимда хатолар қила бошладик. Бу мусобақа мен учун ҳам, футболчилар учун ҳам катта тажриба бўлди. Ўйлайманки, бу келажакда бизга катта мотивация беради.

Албатта, футболчилар билан жуда кўп мулоқот қилдим. Гуруҳимизда кучли жамоаларга қарши ўйнашимиз кераклигини билардик. Лекин бу натижадан афсусдамиз.

Ҳа, хатолар қилдик. Бироқ мен футболчилардан умуман шикоят қилмоқчи эмасман. Улар қўлларидан келган барча ишни қилишди ва мен улардан фахрланаман", — деди Каннаваро.