Кападзе жамоаси Анталияда "Қайсар"ни мағлуб этди

Олдин хабар бериб ўтганимиздек, Тимур Кападзе бошчилигидаги Ўзбекистон олимпия терма жамоаси Туркиянинг Анталия шаҳрига ўқув-машғулот йиғинини ўтказиш учун жўнаб кетганди. Таркибда “Олимпик” футболчилари билан бир қаторда бошқа клублардан ҳам номзодлар чақирилган бўлиб, уларнинг орасида “Андижон” жамоасининг истеъдодли футболчиларидан бири Фарҳод Соҳибжонов ҳам бор.

Бугун Кападзе жамоаси Қозоғистоннинг “Қайсар” клубига қарши назорат учрашувида иштирок этди. Ушбу тўқнашувда вакилларимиз 2:0 ҳисобида ғалаба қозонишди. Дастлабки голга Отабек Жўрақўзиев муаллифлик қилган бўлса, иккинчи гол Фарҳод Соҳибжоновнинг ҳисобига ёзилди.

Футболчимиз иккинчи бўлимда захирадан майдонга туширилди ва ўйинга жуда яхши киришиб кета олди. Эътиборли жиҳати шундаки, “Қайсар” клубини “Андижон”нинг собиқ устози Виктор Кумиков бошқариб бормоқда. Олимпия терма жамоамиз навбатдаги учрашувини яна “Қайсар”га қарши ўтказади ва бу баҳс 26 декабрга белгиланган.

"Андижон" матбуот хизмати.