Каратэ WKF бўйича Ўзбекистон кубоги якунланди. Умумжамоа ҳисобида Тошкент вилояти етакчи...

Ўзбекистон каратэ Миллий федерацияси томонидан ташкил қилинган ва Тошкент шаҳрининг "Универсал" спорт мажмуасида 16 сентябрь куни старт олган каратэ WKF бўйича Ўзбекистон кубоги баҳслари бугун ўз якунига етди.

7 -18 ва +18 ёшлилар иштирок этган мазкур мусобақа қизғин ва кескин баҳсларга бой бўлди.
Уч кун мобайнида давом этган турнир якунига кўра, умумжамоа ҳисобида Тошкент вилояти биринчи, Сурхондарё вилояти иккинчи ўринни олган бўлса, Андижон вилояти эса кучли учликни якунлаб берди.

Таъкидлаш жоизки, мазкур мусобақа терма жамоамиз мураббийлари учун жорий йилнинг декабрь ойида Қозоғистоннинг Алмати шаҳрида бўлиб ўтадиган ўсмирлар, ёшлар ва катталар ўртасидаги Осиё чемпионати, қолаверса ноябрь ойида БААнинг Дубай шаҳрида ташкил этиладиган катталар ўртасидаги Жаҳон чемпионатига энг муносиб спортчиларни саралаб олиш имконини берди.