Кеч бўлганда очилган талант

“Лестер Сити”нинг 35 ёшли ҳужумчиси Жейми Варди Англия премьер-лигасининг навбатдаги турида “Вулверхэмптон” дарвозасини ишғол қилди.

Бу унинг Англия премьер-лигасидаги 100-голи сифатида қайд этилди. Шу тариқа, Жейми Варди ёши 30дан ошганда юзлик маррани забт этган биринчи футболчи сифатида тарихга кирди.

Жейми Варди 2012 йили “Лестер” сафига қўшилгунга қадар Англиянинг қуйи дивизионларида “Стоксбридж Парк Стилс”, “Галифакс Таун”, “Флитвуд Таун” каби жамоалар шарафини ҳимоя қилган.

Ўн йил муқаддам “тулкилар” бу ўйинчини бир миллион фунтга сотиб олган. Бу нарх Англия қуйи лигалари учун рекорд сумма ҳисобланади. Шундан бери Варди “Лестер Сити” сафида барча турнирларда 345 та учрашув ўтказиб, ўз ҳисобига 154 та тўп ёздириб қўйди.