Кеча "Барселона" таништирган футболчи 3 йил олдин "Камп Ноу"да оддий муҳлис эди (Фото)

Френки Де Йонг - расман "Барселона" футболчиси. У "Аякс"дан 75 млн евро эвазига кўчиб ўтди. Уни "Камп Ноу"да таништиришди. Каталонияликларнинг квадрат шаклдаги янги либосини ҳам кийди, ҳаттоки испан тилида дастлабки сўзларини айтди: "Барчага салом! Мана мен шу ердаман. Мавсум бошланишини сабрсизлик билан кутяпман". Ёш иқтидорни тақдимот маросимига 20 минг мухлис келди.

У билан бирга унинг қиз ўртоғи Микки Кимени ҳам ташриф буюрди ва Френки ҳақида бирмунча қизиқ воқеаларни айтиб берди. Масалан, бир неча йил аввал биргаликда "Камп Ноу"га келишганини: "3 йил олдин биз "Камп Ноу"га келгандик, сабаб орзуимиздаги жамоани стадиондан қўллаб туриш эди. Мана биз яна шу ердамиз, орзуларимиз билан яшаяпмиз".

Микки ўзининг инстаграм саҳифасида шундай пост қолдирди: "20 минг инсон сени қўллаш учун келди ва барча сени исмингни айтиб олқишлади. Ушбу онларда мен бир йил олдин таътилда бўлганимизни эсладим. Сен ўшанда жароҳат олгандинг ва шундай дегандинг: "Менинг мақсадим "Аякс" ярим ҳимоячиси бўлиш ва Голландия термасидан чақирув олиш". Ана энди ўзинга бир қара сен барчасига эришдинг. Биз ғолиблар жамоасимиз. Мумкин бўлмаган нарсани қилишга ҳаракат қил".

Де Йонг билан биргаликда нафақат қиз ўртоғи, балки бутун оиласи ташриф буюрди.

"Мен барча оиламни тақдимот маросими учун "Барселона"га олиб бордим. Фақатгина менинг бобом келмади, сабаби менинг 21 ёшимда у вафот этди (Ҳозир Френки 22 ёшда, туғилган кун санаси 12 май). Бобом буни кўра олмагани менга аламли. Менинг рақамим унинг хотираси учундир".

Голландиялик футболчи "Барса"да 21-рақамни олди. Френки ва Миккининг ҳозирги режаси Каталониядан уй сотиб олиш. Қизнинг айтишича, уй кўришга ҳам улгуришди, аммо ҳали сотиб олишмади.