"Kelajagimizni o‘zgartirish uchun qaerdadir tavakkal ham qilish kerak" yoxud pro liga futbolchisi qanday qilib legionerga aylanmoqda?!

Kuni kecha saytimiz orqali “Dinamo”da to‘p surgan iste’dod egasi – Shoxruh Abdurahmonovning Belarus chempionati vakili – “Energetik-BGU” jamoasining qishki yig‘inida ishtirok etayotgani to‘g‘risida xabar bergandik.

Rostini aytganda, muxlislar orasida Abdurahmonov hali to‘liq ko‘zga tashlanib ulgurmagandi. Asosan “Dinamo”da to‘p surgan holda samarqandlik ishqibozlarni quvontirib kelayotgandi va ayniqsa, o‘tgan yili jamoasining Superligaga chiqishida katta hissasi tegdi. Shuning uchun ham u mavsumning eng yaxshi futbolchisi bo‘ldi.

Shoxruh Abdurahmonovni oldinda yorqin kelajak kutyapti. Uning legionerga aylanayotgani ham bejiz emas. Shundoq ham unga Superligadan jiddiy chorlovlar mavjud. Ammo u Belarus chempionati orqali Evropaga ketishni niyat qilgan. Ayni paytda “Energetik” safida shug‘ullanayotgan futbolchi Sports.uz muxbiri bilan muloqotda bo‘ldi.

O‘tgan yilgi mavsum haqida

- Chempionat davomida barchasi - muxlislar, murabbiylar, jamoadoshlarimni yordami bilan bo‘ldi deb o‘ylayman. Qo‘limdan kelganicha harakat qildim. Jamoadagilar, muxlislar va murabbiylar menga ishonch bildirishdi. Shuning uchun klubda o‘zimni bemalol his qila oldim. 2021 yilgi mavsum juda ham qiziq o‘tdi. Yaxshi o‘yinlarga va raqobatga boy mavsum bo‘ldi. Barcha raqiblarga qarshi qiyin o‘yinlarni o‘tkazdik. Har bir ochko uchun qattiq kurashdik. “Dinamo”da juda ahil jamoa yig‘ilgandi, futbolchilar bilan inoq oila bo‘ldik deb aytsam bo‘ladi. Avvalambor, Hakim Fuzaylovni alohida aytmoqchimanki, u bizni bir oila qila oldi. Ichki muhit ham yaxshi edi. Futbolchilar bir-biridan umuman xafa bo‘lishmadi. Hamma bir-birini qo‘llab-quvvatlagani uchun ham Superligaga chiqdik deb o‘ylayman. Barcha birdek mehnat qildi. Jamoa, muxlislar va o‘zimiz uchun ham o‘ynadik.

“Energetik-BGU”da qanday paydo bo‘ldi?

- Bu variant agentlarim tomonidan tavsiya qilindi. O‘zim ham oldindan chetga chiqib o‘ynashni juda xohlardim. Shu bois xorijda kuchimni sinab ko‘rmoqchiman. Faqat oldinga intilish maqsadim bor. “Energetik-BGU” bilan mashg‘ulotlarda ishtirok etyapman. Murabbiylar, jamoadagilar men bilan yaxshi munosabatda. Xudo xohlasa, bu erda qolaman. Bu yilgi mavsumni Belarus chempionatida o‘tkazaman degan umiddaman. Qolgani o‘zimizga bog‘liq. Mehnat qilsak, yana o‘sishda davom etaman. Asta-sekin oldimga qo‘ygan maqsadlarimga erishyapman. Men esa aynan shu variantni xohladim.

Hammasi qachon hal bo‘ladi?

- Agentimni kutyapman, bir hafta ichida Belarusga kelishi kerak. Yaqin orada aniq bo‘lib qoladi. Ammo klubdagilar meni olib qolishmoqchi. Agentim bu erga etib kelganidan so‘ng rahbariyat bilan gaplashadi va barchasi hal qilinadi.

U Superligada to‘p surishdan ko‘ra, legionerga aylanmoqchi. Bu tavakkalchilikmi?

- To‘g‘ri, o‘rinli savol. O‘zimga ishonchim baland. Hech qanday qo‘rquv yo‘q. Hammasi Xudodan va Xudo uchun tavakkal qilamiz. Chunki kelajagimizni o‘zgartirish uchun qaerdadir tavakkal qilish ham kerak deb o‘ylayman.  

Abdurahmonov o‘tgan yili yozda ham “Dinamo”dan ketishi mumkin edi...

- To‘g‘ri, variantlar bor edi, yaxshi takliflar bo‘lgan. O‘ynab turgan jamoamni va menga ishonayotganlarni yarim yo‘lda tashlab ketishim noto‘g‘ri bo‘lardi. Muxlislar ishonch bildirib turgandi. Shu bois vazifani hali hal qilmasdan turib ketib qolsam yaxshi ish bo‘lmasdi. Maqsadim “Dinamo”ni Superligaga olib chiqish va yorug‘ yuz bilan ketish edi. Xudoga shukr, o‘ylagan maqsadimga erishdim.

Yangi mavsumda “Dinamo”ni nimalar kutyapti?

- Hozir “Dinamo”dagi yangiliklardan xabarim yo‘q. Ammo klub o‘z oldiga yaxshi maqsad qo‘ygan. Yangi murabbiyni olib kelish ham bejizga emas. Tarkibga yaxshi futbolchilarni jalb qiladi deb o‘ylayman. Umid qilamanki, bu yil Samarqandda yaxshi jamoa bo‘ladi. Natija ham shunga yarasha ijobiy bo‘ladi deb o‘ylayman. Chunki klubda yaxshi odamlar ishlayapti.

Fuzaylovning iste’fosi

- Nima bo‘lganda ham bu jamoadagilarning qarori, bunga hech nima deya olmayman. Ularning o‘rtasida shunday kelishuv bo‘lgan. Shartnoma bir yilga tuzilgan. To‘g‘risi, qolganini bilmadim, barchasi o‘zaro kelishuv asosida bo‘lgan deb o‘ylayman.

Superligadagi takliflar

- Ha, menga Superligadan takliflar bo‘ldi. Oldimga qo‘yilgan maqsad bo‘yicha qaror qabul qilib bo‘lgandim. Yaxshigina jamoalardan takliflar olgandim. Maqsadim aniq edi va bundan voz kecha olmasdim. Shu bois chetga ketishni tanladim.