Кетганлардан келганлар анча заиф!

Испания Суперкубогидаги қоқилиш ва «Қирол кубоги»даги омадсизликдан сўнг, кўплаб мухлислар «Реал»нинг қийин аҳволда қолганини чуқур ҳис этди. Айниқса, Испаниянинг 3-дивизион вакилидан учралган мағлубият, Зиданнинг келажагига соя солгандек туюлди…

Аслида, Зинедин Рафа Бенитесдан жамоа постини қабул қилиб олгач, таркибдаги футболчилар билан 3 бор ЕЧЛда зафар қучишни уддалади. Шу ўринда, муҳим бир фактга эътибор қаратинг. Зидан тайёр жамоа билан иш олиб борди. Бу йигитлар унинг келишига қадар жамоага жалб этилган эди.

Ғалабали мавсумларга қарамай, Зидан «Реал»ни тарк этди. Испан нашрлари бунга мураббийнинг Флорентино Перес билан трансферлар бобида келиша олмай қолганини баҳона қилиб кўрсатди. Перес Зидансиз клуб қийин аҳволда қолиб кетишини англади ва уни ортга қайтарди. Бу сафар Зидан трансферлар бобида ўзи бош ролни ижро этиш шарти билангина қайтди. Афсуски, Зиданнинг талаб-истаклари асосида жамоага жалб этилган 12 та футболчининг атиги 5 таси таркибда, xолос. Қолганлари ёки клубни тарк этган, ёки ижара асосида бошқа жамоа шарафини ҳимоя қилмоқда.

Таркибда қолган футболчилар: Эден Азар, Ферлан Менди, Мартин Эдегор, Эдер Милитао ва Родриго

Кетган футболчилар: Альваро Мората, Тео Эрнандес, Дани Себальос, Лука Йович. Ашраф Хакими ва Рейнер.

Энди ушбу йигитларнинг фаолиятига қисқача назар ташлаймиз!

Альваро Мората – «Ювентус»дан 30 миллионга сотиб олинган

Айнан Альваро «Реал»даги Зиданнинг биринчи трансферига айланган. «Қироллик клуби» «Юве» шарафини ҳимоя қилаётган ҳужумчини қўлга киритиш учун ортга қайтариб олиш имкониятини ишга солди. 2016/17 йилги мавсумда Мората Мадрид клуби сафида 20 та гол киритди ва «Реал»га катта кўмак берди. Жамоа ЕЧЛ ва Испания чемпиони бўлди. Афсуски, ҳужумчи Зидан учун абадий захира вариант бўлиб қолди. Бензема қандай аҳволда бўлишидан қатъи назар, Альваро унинг захирага олинишини кутишга мажбур бўлди. Айнан шу омил сабабли, ўз истаги билан «Челси»га йўл олди. Тўғри, Мадрид клуби уни фойда эвазига сотди, бироқ сифатли ҳужумчидан айрилди. Бенземани йўқлигини билинтирмайдиган захирадаги жокернинг кетиши, кейинроқ салбий таъсир кўрсатди.

Тео Эрнандес – «Атлетико»дан 24 миллионга сотиб олинган

У ҳозир «Милан» сафида А Серияни «ёндирмоқда»! Ҳимоячи бўлишига қарамай, қаҳрамонимизнинг ҳисобида аллақачон 10+11 натижа мавжуд. «Россонерилар» сафида 59 та ўйинда иштирок этган ҳимоячини трансфермаркт 50 миллион еврога баҳоламоқда. Аслида, Теони Зидан секин-аста Марселонинг ўрнига қўйиши ва қанотни унга ишониб топшириши мумкин эди. Агар бу иш амалга ошганида, Ферлан Менди учун ортиқча пул сарфлашнинг ҳожати бўлмасди. «Милан» аллақачон Теонинг трансферини тўлиқ қўлга киритиш илинжида. «Реал» эса, Ферлан Мендининг ўйинида прогресс кузатилишидан умидвор.

Ашраф Ҳакими – «Реал» тарбияланувчиси

Зидан «Кастилья»даги марокашлик футболчини асосий таркибга олди. Бир нечта учрашувларда Дани Карвахалнинг ўрнига майдонга ташлади. 2017/18 йилдаги ажойиб мавсумдан сўнг, «қаймоқранглилар» Ҳакимини ижара асосида «Боруссия» Дортмунд сафига жўнатиб юборишди. Икки йил давомида Ашраф сайёрамизнинг энг кучли қанот ҳимоячиларидан бирига айланди. «Реал» Карвахалнинг ўрнини эгаллашга қодир ижрочини таркибга қайтариш ўрнига, уни «Интер»га сотиб юборди. Тўғриси, бу қарор нима учун қабул қилингани ғалати. Тўғри, молиявий плюс мавжуд, бироқ таркибдаги муаммо-чи? Дани жароҳат олгач, мураббий унинг ўрнини Альваро Одриосола билан тўлдирмоқчи бўлди. Афсуски, испан бунга тайёр эмас экан. Кейин, Лукас Васкесни ҳимояга қўйишга тўғри келди. Тан олиш лозим, Васкес қўлдан келганча вазифани бажармоқда. Агар Ҳакими қўйиб юборилмаганида, «Реал» бир йўла иккита футболчидан айрилмаган бўлар эди.

Дани Себальос – «Бетис»дан 16,5 миллион еврога сотиб олинган

Ҳар бир омадсиз трансфер эса, оғир тош сингари «Реал»ни пастга тортмоқда. Ҳозирда, жамоани келаси мавсумда ким бошқариши ҳақида миш-мишлар юрибди. Шунингдек, трансфер сиёсатини тўлиқлигича Пересга қайтариб бериш орқали Зайниддин постда қолиши ҳам мумкин. Зидан кучли мураббий, бироқ ҳар қандай мураббийнинг ожиз нуқталари мавжуд. Айнан трансферлар ҳозирча “Зизу”нинг меҳнатига соя солмоқда. Агар Перес бу вазифани ундан тортиб олса, бу барча учун якунда фойда келтириши мумкин.

Иқтидорли бўлишига қарамай, Дани «Реал»нинг «чиғириғидан» ўта олмади. Зидан қайтгач, ёш футболчини четга суриб ташлади. Ваҳоланки, Солари ва Лопетеги даврида футболчи ўйин амалиётга эга бўлаётган эди.  Мураббий ўз синовидан ўтган қария – Модричга кўпроқ ишонч билдирди. Оқибатда, Себальос ўз фаолиятини давом эттириш мақсадида «Арсенал»га равона бўлди. Мана икки йилдан бери ярим ҳимоячи Лондон клуби шарафини ҳимоя қилиб келмоқда.

Эден Азар – «Челси»дн 115 миллион еврога сотиб олинган

Француз мутахассиси Эденга бефарқ эмаслигини анчадан бери ошкор қилиб келаётган эди. Унинг юқори даражадаги ижрочи эканлигини ҳақида фикр билдирган мураббий бир йилдан кейин «Челси»дан уни ўз клубига олиб келишига қарор қилди. Аслида, Мадрид супер клуби 25 ёшдан катта бўлган юлдузларни ўз сафига қўшиб олишни хуш кўрмайди, лекин Зидан учун Перес истисно қилди. Оқибатда, 115 (айрим манбаларда 160 миллион евро) миллионлик футболчи 33 та ўйинда иштирок этди, холос. Роналдунинг ўрнини эгаллаши кутилган бельгиялик атиги 3 та гол киритди. Айнан шу трансфер сабабли, «Реал» узоқ муддат ўзига кела олмади. Нишонга тегмаган ўқ туфайли клуб ўз ўйин схемасини ўзгартиришга ҳам мажбур бўлди.

Лука Йович – «Айнтрахт»дан 63 миллион евро

Лука ўзбошимча эканлигини аввал бошидан маълум эди. «Реал» оғир характер эгаси бўлган серб билан яхши танишмай туриб, трансферга қўл урди ва қаттиқ адашди. «Қаймоқранглилар» сафидаги фаолияти давомида атиги 2 гол урган Лука, ортга қайтгач, биринчи учрашувидаёқ захирадан майдонга тушиб, 2 та гол урди.

Эдер Милитао – «Порту»дан 50 миллион еврога сотиб олинган

«Порту» Эдерни «Реал»га сотиб юборишидан бир йил илгари арзимаган пул эвазига сотиб олган эди. Бир йилдан сўнг, «аждарлар» Милитаони олган суммаларидан 7 баробар қимматроққа сотиб юборишди. Ҳали ҳимоячи сифатида тўлиқ шаклланмаган Эдер учун 50 миллион еврони нега сарфлангани аниқ. У келажакда Рамоснинг ўрнини эгаллаши лозим эди. Ҳозирча, унинг трансфери ҳавога отилган ўқни эслатиб юбормоқда.

Родриго – «Сантос»дан 45 миллион еврога сотиб олинган

Ёш Родриго Винисиусдан фарқли ўлароқ, сермаҳсуллик намойиш этмоқда. 43 та ўйинда 8 та гол ва 9 та ассист. Ҳали ёш бўлишига қарамай, унинг имкониятларини юқори баҳолаш мумкин. Ҳозирча, у «Реал»га кўмакчи, холос. Асосий ролда ўзини қандай ҳис этиши эса, катта сўроқ остида турибди.

Рейнер – «Фламенго»дан 30 миллион еврога сотиб олинган

Рейнерни клуб келажак учун сотиб олгани аниқ, аммо бу инвестиция клубга фойда келтирмаслиги ҳам ҳеч гап эмас. Аввалига бразилиялик вингер «Кастилья»да тўп сурди. Кейин уни 2 йилга ижара асосида «Боруссия» Дортмундга «равона» қилишди. Ҳозирда, Дортмунд клуби сафида Рейнер деярли ўйин амалиётисиз қолиб кетган. Бу кетишда 30 миллион евродан умидни узиш ҳеч гап эмас.

Мартин Эдегор – Ижарадан қайтди

Мартин Мадридга 2014 йилда ўспиринлик чоғида кўчиб келган эди. Уни дарров «Кастилья»га ўтказишди. У ерда норвегиялик футболчи Зидан билан танишди. Профессионал даражага чиққач, клуб Эдегорни ижара асосида турли жамоаларга юборишни бошлади. Зидан Модричнинг даври ўтиб бораётганини ҳис қилгач, Мартинни ортга қайтарди. Афсуски, мураббий ўз одатига содиқ қолганча – синовдан ўтган футболчиларга ўйин амалиёти тақдим этмоқда. Эдегор эса, мураббий ўз ваъдасида турмаганидан хафа. Шу боис, қишда «Реал»ни тарк этмоқчи эканлигини расман ошкор қилди. Зидан эса, 35 ни уриб қўйган Лукани Эдегордан устун кўришда давом этмоқда.

«Реал»нинг трансферлари омадсиз! Боз устига, асосий таркибга киришнинг имкони йўқ!

Мадрид жамоаси раҳбарлари сўнгги пайтларда керакли кадрларни қўлдан чиқариб юбормоқда. Қўшимчасига, трансферларда ҳам бирин-кетин хато қарорлар чиқармоқда. Зидан танлаган футболчилар негадир асосий таркиб учун яроқсиз бўлиб чиқмоқда.

Ҳар бир омадсиз трансфер эса, оғир тош сингари «Реал»ни пастга тортмоқда. Ҳозирда, жамоани келаси мавсумда ким бошқариши ҳақида миш-мишлар юрибди. Шунингдек, трансфер сиёсатини тўлиқлигича Пересга қайтариб бериш орқали Зинедин постда қолиши ҳам мумкин. Зидан кучли мураббий, бироқ ҳар қандай мураббийнинг ожиз нуқталари мавжуд. Айнан трансферлар ҳозирча Зизунинг меҳнатига соя солмоқда. Агар Перес бу вазифани ундан тортиб олса, бу барча учун якунда фойда келтириши мумкин.