Кевин де Брюйнега иш таклиф қилаётган 11 клуб ва уларнинг рақобатчилари номи ошкор қилинди

“Манчестер Сити” плеймейкери Кевин де Брюйне жорий мавсум якунланиши билан эркин агент мақомини олади ва клубни тарк этади.

Томонлар узоқ давом этган ўзаро ҳамкорликни тўхтатишга қарор қилган ва бельгиялик юлдузга янги шартнома берилмайди.

The Telegraph нашрининг маълум қилишича, “Манчестер Сити”га эгалик қилувчи City Football Group холдинги 33 ёшли футболчини ўзининг бошқа жамоаларидан бирига ўтказмоқчи.

Бу қудратли компания дунёнинг турли мамлакатларидаги “Мельбурн Сити”, “Нью-Йорк Сити”, “Мумбаи Сити”, “Монтевидео Сити Торке”, “Труа”, “Ломмель”, “Палермо”, “Баия”, “Жирона”, “Шэньчжэнь”, “Йокогама Ф-Маринос” каби клубларга ҳам эгалик қилади.

Айрим манбалар Кевиннинг ўзи Лионель Месси ўйнаётган “Интер Майами”га ўтишни кўзлаётгани ҳақида маълумот тарқатмоқда.

Бундан ташқари, Саудия Арабистонининг бадавлат клублари бельгиялик юлдузни бир неча мавсумдан бери ўз сафига қўшиб олишга ҳаракат қиляпти.