Кейн Камавинганинг қизил карточкасига баҳо берди

"Бавария" ҳужумчиси Харри Кейн Чемпионлар лигаси чорак финали жавоб баҳсида "Реал"га қарши ўйинда (4:3) Эдуардо Камавинганинг майдондан четлатилиши ҳақида фикр билдирди.

Учрашувнинг 86-дақиқасида Камавинга рақиб ярим майдонида Кейнга нисбатан қоидабузарлик қилди ва ҳакам ҳуштагидан кейин ҳам тўпни рақибга бермади. Шу вазият учун бош ҳакам унга иккинчи сариқ карточкани кўрсатиб, майдондан четлатди.

— Менимча, бу ҳеч қандай шубҳасиз қизил карточка. Икки ўйинни ҳисобга олсак, ғалабага лойиқ бўлган томон биз эдик.

Шунингдек, "Реал"нинг голи ҳам ҳисобга олинмаслиги керак деб ўйлайман, чунки ўйин бошида Рюдигер Лаймерга нисбатан қоидабузарлик қилган, аммо бу вазият қайд этилмаган, — деди Кейн.