Килиан Мбаппе "Бенфика"га қарши ўйинда майдонга тушмайдими?

"Реал Мадрид" ҳужумчиси Килиан Мбаппе чап тиззасидаги жароҳатдан кейин тикланишни давом эттираётганига қарамай, 24 февраль, сешанба куни машғулотни муддатидан олдин тўхтатишга мажбур бўлди. Бу ҳақда L'Equipe хабар бермоқда.

Манба маълумотларига кўра, форварднинг 25 февраль, чоршанба куни УЕФА Чемпионлар лигасининг плей-офф босқичи доирасида "Бенфика"га қарши жавоб учрашувида иштирок этиши катта савол остида қолмоқда. Таъкидланишича, тиззасидаги оғриқ ҳали ҳам безовта қилаётгани сабаб клуб, эҳтимол, футболчига дам беришни маъқул кўрмоқда.

Шунингдек, “қироллик клуби” бош мураббийи Альваро Арбелоа Мбаппенинг ўйинда қатнашиши бўйича қарорни бир кунга кечиктириш тарафдори экани айтилмоқда. Бу ҳолатда, француз ҳужумчисининг Лиссабон клубига қарши майдонга тушиш эҳтимоли ошиши мумкин.