Kloppning sobiq jamoadoshi: "Yurgen "Real"ni boshqarishni orzu qilganini aytgan"

"Maynts" jamoasida Yurgen Klopp bilan birga to‘p surgan Miroslav Tanga nemis mutaxassisining kelajakdagi rejalari haqida gapirdi. 

Tanganing so‘zlariga ko‘ra, Klopp "Liverpul"ni tark etayotgan paytda unga ikki orzusi borligini aytgan — Germaniya terma jamoasi va "Real Madrid"ni boshqarish.

– U "Liverpul"dan ketar ekan, menga shunday degandi: "Mening ikki orzum bor — Germaniya terma jamoasini va "Real"ni boshqarish". Ular amalga oshadimi-yo‘qmi, bilmayman. Har holda, u "Real" bosh murabbiyligi uchun nomzodlardan biri. Ammo bu hozircha faqat taxmin, – dedi Tanga.

Uning ta’kidlashicha, Klopp Angliyaning boshqa biror klubini boshqarishni hech qachon xohlamagan, shuningdek, Italiya yoki Frantsiya chempionatlariga qiziqmaydi.

– U hech qachon o‘zini boshqa biror angliyalik klubda ko‘rmagan. Seriya A va Frantsiyaga ham qiziqishi yo‘q. Bir kuni u Germaniya terma jamoasiga bosh murabbiy bo‘ladi, deb o‘ylayman.

Hozirda Miroslav Tanga Serbiyaning «Voyvodina» klubida faoliyat olib bormoqda va Klopp bilan yaqinda aloqa qilganini ta’kidladi:

– Biz u bilan gaplashdik. Hozirda u "Red Bull" tizimida ishlayapti va butun dunyo bo‘ylab ularning klublari bilan hamkorlik qilmoqda. U hozircha murabbiylikni qayta boshlash haqida o‘ylamayapti. Qachondir zerikib, skameykaga qaytadimi-yo‘qmi, u ham bilmaydi, – dedi u.