Клубларимизни ўзига жалб қилаётган Туркия, бир ўқ билан икки қуённи урган Кападзе, Тошкентда эса бор-йўғи 3 та жамоа!

Янги мавсумга кўрилаётган тайёргарлик кўпинча Тошкентда олиб бориларди. Лекин ҳозир бироз ҳувиллаб қолгандек. Нега дейсизми, чунки Суперлиганинг аксар клублари Туркияга кетишган.

Тўғриси, қишки йиғинлар чоғида анчадан бери бунақасини кўрмагандик. “Пахтакор”, “Насаф”, “Бунёдкор”, АГМК, “Металлург”, “Навбаҳор”, “Нефтчи”, “Динамо”, “Қизилқум”, “Сўғдиёна” ва “Андижон”. Бугун айнан “Сўғдиёна” билан “Андижон” Туркиянинг Анталия шаҳрига етиб борди. “Нефтчи” эса у ердаги йиғинини якунлади.

Сайтимиз орқали клубларимизнинг ушбу йиғини борасидаги маълумотларни имкон қадар ҳукмингизга ҳавола қилиб боряпмиз. Ҳатто, айрим жамоалар қишки йиғиндаги ўзининг иккинчи хориждаги машғулотларини ўтказишмоқда. Умуман айтганда, клубларнинг Туркияда йиғин ўтказишини ижобий баҳоласа бўлади. Чунки Анталия каби курорт шаҳарларда айниқса, футбол учун жуда қулай шарт-шароитлар яратилган. Шу боис ҳар йили у ерга дунёнинг турли бурчакларидан жуда кўплаб жамоалар тайёргарлик кўриш учун борадилар. Натижада халқаро даражадаги ўртоқлик учрашувларини ўтказиш имконияти жуда катта. Бу ўз навбатида клубларимиз учун ҳам фойдадан ҳоли бўлмайди. Ўйин амалиётини яхшилаш, тажриба оширишда, бу каби чет эл клубларига қарши учрашувлар жуда асқотади-да. Эътибор бераётган бўлсангиз, ҳар куни Туркиядан дараклар сифатида ўтказилаётган ўйинлар ҳақида ҳам маълумотлар бериб боряпмиз.

Суперлиганинг 10 та клуби Туркияда, қолган 4 таси-чи? Қайси жамоаларимиз ҳеч қаерга чиқмаган ҳолда ўзимизда шуғулланяпти? Бахтиёр Ашурматов бошчилигидаги “Қўқон-1912” Туркияга бормасдан асосан Қўқон ва Тошкентда йиғин ўтказяпти. Маълумот ўрнида айтмоқчимизки, қўқонликлар Фарғонада ўтказилган “Ҳоким Кубоги” мусобақасида ғолиб чиқди. Мураббий эса режасига Туркия сафарини киритган ёки киритмагани бизга қоронғу, аммо қўқонликлар сафарга чиқмасдан ўзимизда йиғин ташкил қилишни маъқул кўрдилар. Селекция ҳам параллел равишда олиб борилаётганидан хабарингиз бор. Айниқса, Қувондиқ Рўзиев ва Жавоҳир Сидиқовнинг қайтарилгани жамоа учун ижобий ҳолат сифатида баҳолай оламиз.

Туркиядан четда қолган яна бир клуб бу “Локомотив”. Очиғи, бироз ҳайрон қолдик. Одатда қишки йиғинларни четда ўтказишни режалаштирадиган “темирйўлчилар”нинг Туркияга кетган Суперлиганинг 10 та клуби орасида йўқлиги турли саволларни келтириб чиқаряпти. Айниқса, жамоада молиявий тарафдан бироз муаммолар борлиги ҳақида эшитяпмиз. Бунинг устига “Локомотив”ни кўплаб етакчилари тарк этди. Охири Жасур Жалолиддинов билан Азиз Амонов ҳам кетишди. Хўш, энди ким қолди? Кахи Махарадзе, Диёр Туропов, Шерзод Файзиев ва Санжар Қодирқулов каби футболчиларнинг зиммаларига жуда катта масъулият тушади. Клуб кўпроқ ёшларга эътибор қаратяпти. Шунинг учун тарк этган етакчиларнинг ўрнига шунга яраша муносиб футболчилар олиб келинмади. Дарвоқе, камерунлик ҳужумчи билан шартнома имзоланди. Аммо ким у? Билганимиз шуки, ўтган йили про лигада “Янгиер” таркибида тўп сурган. Жамоа сафига яна янги ўйинчилар қўшиладими, билмадик. Бош мураббий Денис Коростиченко йиғаётган таркиб мавсумда қандай каромат кўрсатишини кузатиш қизиқ.

Туркия сафаридан четдан қолган 4 та клубдан яна бири Термизнинг “Сурхон” жамоасидир. Sports.uz сайти орқали клубдаги ўзгаришлардан сиз ўқувчиларни бохабар қилиб боряпмиз. Рости, клубдаги вазият ҳамон мураккаб бўлиб турибди. Чунки ҳали футболчилар билан шартномалар имзоланмаган. Тайёргарлик ҳам кеч бошланган, 19 январдан машғулотларга киришишди. Ҳали бир ой ҳам бўлмади. Аммо шу вақт ичида мураббийлар ўзгарди. Аввалига Хорди Фабрегат Валманья бошчилигидаги испаниялик мураббийлар келганди, аммо лицензия билан боғлиқ муаммо туфайли улар кетишди ва яқинда испаниялик бошқа мутахассис – Анхель Лопес келди. Бироқ ҳали ҳам клубнинг юридик томондан ишлари тўлиқ ҳал этилмаган. Мана шу жараён чўзиляпти. Ҳали ҳал қилиниши керак бўлган муаммолар турганида “Сурхон”нинг Туркияга йўл олиши ҳам балки мантиққа тўғри келмасди. Чунки боя айтганимиздек, клуб ўзи йиғинни жуда кеч бошлади. Мураббий ўзгариши эса яна ишларни ортга суриши тайин. Гарчи янги келгани анча тажрибали бўлса-да, унинг олдида вақт жуда тиғиз. Янги менталитетга кўникиши, ўзбек футболига мослашиши ва ўйинчиларимизни ўрганиши осон бўлмайди. Ўзининг услубига ўргатиб олиши ҳам вақт талаб қиладиган жараёндир.

Суперлиганинг янги дебютанти “Олимпик” ҳақида ҳали тузук-қуруқ янгилик ҳам айтилмаяпти. Бош мураббий Тимур Кападзе Ўзбекистон U-21 терма жамоасини ҳам бошқараётганини биласиз. Айни пайтда у терма жамоа билан Туркияда йиғин ўтказяпти. Биздаги маълумотларга қараганда, “Олимпик”нинг деярли 99 фоиз футболчиси терма жамоа ихтиёрида Анталияда шуғулланяпти. Демак, ўз-ўзидан “Олимпик” таркибининг негизи ҳам параллел равишда янги мавсумга ўша ерда тайёрланяпти. Бундан чиқди, Кападзе бир ўқ билан икки қуённи “урди”. У ҳам терма жамоа, ҳам клубини Туркияда шуғуллантириб олмоқда. Бироқ негадир бу ҳақида маълумотлар деярли берилмаяпти.

Қисқаси, шунақа гаплар! “Локомотив”, “Қўқон-1912” ва “Сурхон” Тошкентда, қолганлар эса Туркияда. Нима бўлганда ҳам клублар янги мавсум учун ҳар қачонгидан кўра жиддий тайёрланишяпти ва масъулиятни ҳис қилишяпти. Қолганини чемпионатда кўрамиз.