"Klubni rejasi meni qiziqtirib qo‘ydi, tavakkal qilmasangiz tarix yoza olmaysiz" - Sherzod Temirov Iroqning "Arbil"iga o‘tgani haqida

Yaqinda Iroq chempionatiga hamyurtimiz Sherzod Temirov ko‘chib o‘tdi. Bungacha ikki yilcha Gonkong chempionatida “Kitchi” sharafini himoya qilib keldi. Yaqinda esa hujumchi Irqoning “Arbil” jamoasi bilan shartnoma imzoladi. Sports.uz jurnalisti esa Temirov bilan suhbatlashdi.

- Sherzodbek, nima uchun aynan Iroq klubini tanladingiz?

- Iroq ligasini tanlashimga sabab, oldinlari bu erda o‘zbekistonliklar o‘ynashmagan. Bu ligada ham yurtimizda yaxshi futbolchilar borligini ajoyib o‘yinlarimiz bilan isbotlashimiz kerak, deb o‘ylayman. Ushbu ligani tanlashimdan xursandman. Klubda kelishimda meni har tomonlama qo‘llab-quvvatlashdi, bu juda ham yoqimli.

- “Arbil” klubini sizni o‘ziga tortgan jihati nimada? Klubni maqsad va rejasi qanday?

- Avvalo, klubni maqsadi va rejalari meni qiziqtirib qo‘ydi. Bu jamoa chempion, katta klub hisobanadi. Iroqda maqsadli jamoalarni men ham doim hurmat qilaman. Bunday klublar bilan ishlashga tayyorman.

- Iroq chempionatida o‘zbek futbolchilari o‘ynashmagan. Bu siz uchun tavakkalchilik emasmi?

- Siz hayotda tavakkal qilmasangiz tarix ham yoza olmaysiz. Ba’zida tavakkal qilishdan qo‘rqmaslik kerak.

- Qaysi raqamni tanladingiz? Klub sizga qanday sharoitlarni yaratdi va qanday kutib oldi?

- Hammasi juda ham ajoyib tarzda o‘tdi. Klub tomonidan kutib olish yaxshi o‘tdi. Raqamlarni endi tanlaymiz. Lekin maydonda raqamlar hech nimani hal qilmaydi. Mashina, uy, ovqatlanish xarajatlarim klub tomonidan ta’minlangan.

- O‘zbekiston chempionatiga qaytishni xohlamadingizmi yoki sizga ma’qul keladigan variant chiqmadimi?

- Menda variantlar bor edi. Hozir o‘ynaydigan yoshdaman. Xudo xohlasa, ko‘proq tajriba to‘plab yana terma jamoamizga foydasi tegadigan hujumchi bo‘lishni maqsad qilganman.