Кўзгуда - "Аякс"! Нидерланд футболи гранди тарихидаги энг фойдали беш трансфер

Хабарингиз бор, жорий йил аввалида «Аякс» ва «Челси» клублари вакиллари Ҳаким Зиешнинг мазкур мавсум ниҳоясига етганидан сўнг Англияга кўчиб ўтиши билан боғлиқ масалани ижобий ҳал қилдилар.  Томонлар ўртасидаги келишувга кўра, «аристократлар» нидерланд футболи гранди сафида ёрқин ўйин намойиш этаётган ушбу ижрочини 40 миллион еврога сотиб олишга рози бўлган. Ўша келишув «Аякс» тарихидаги топ-5 трансферлар рўйхатида 4-ўринга лойиқ топиладиган бўлди. Шу воқеа муносабати билан мазкур клуб томонидан амалга оширилган мана шундай топ-трансферларга эътибор қаратамиз. 

1. Маттейс де Лигт

Қайси клубдан сотиб олинган? Сотиб олинмаган, де Лигт клуб тарбияланувчиси ҳисобланади. Қайси жамоага трансфер қилинган? 2019 йили «Ювентус»га. Трансфер қиймати: 85,5 млн.евро.

Де Лигт «Аякс» академиясига жалб этилганда 10 ёшли болакай бўлган. Бунга қадар у «Абкауде» клубининг болалар жамоасида тўп сурган. Ўша кезларда бақалоқ бўлган бу болакай айнан «Аякс» тизимида ҳар томонлама шаклланган футболчи даражасига кўтарилди. Бежизга уни қўлга киритиш учун қитъадаги топ-клублар ўзаро кураш олиб бормадилар. Амстердамликларни эса «Ювентус» томонидан юборилган таклиф қаноатлантирди. Чунки бошқа даъвогарлар Маттейс учун сўралган пулни тўлашга рози бўлмагандилар.

2. Френки де Йонг

Қайси клубдан сотиб олинган? 2015 йили «Виллем II»дан 10,13 млн.еврога. Қайси жамоага трансфер қилинган? 2019 йили «Барселона»га. Трансфер қиймати: 75 млн.евро.

«Аякс» раҳбарияти бундан беш йил муқаддам «Виллем II»да ярқ этиб порлаган 18 ёшли Френкини сотиб олиш учун 10 миллион евродан сал кўпроқ пул тўлаганди. Кўриб турганингиздек, истеъдодли ярим ҳимоячининг ўтган йил ёзги трансфер чоғида «Барселона»га кўчиб ўтишидан нидерланд суперклуби мўмай фойда олган. Айтиш ўринлики, 2018-19 мавсум    «Аякс»нинг ЧЛда ярим финалгача етиб келишига салмоқли ҳисса қўшган ижрочилардан бири бўлган де Йонгнинг ўзи «Барса»га кўчиб ўтишга олдиндан розилик берганди. Шу боис томонлар ўртасидаги музокара силлиқ кечган.

3. Давинсон Санчес

Қайси клубдан сотиб олинган? 2016 йили «Атлетико Насьонал»дан 5 млн.еврога. Қайси жамоага трансфер қилинган? 2017 йили  «Тоттенхэм»га. Трансфер қиймати: 42 млн.евро.

Колумбиялик ушбу футболчи «Тоттенхэм»да дастлабки икки мавсумни яхши ўтказгани эвазига «Аякс»нинг ҳисоб рақамига қўшимча бонуслар ўтказилишини таъминлаб бўлган. Нидерланд клуби скаутлари иқтидорли ўйинчиларни қидириб топиш масаласида бошқалардан анча илгарилаб кетганлар, дея баралла айтиш мумкин. Улар кўпчиликнинг эътиборидан четда қолган футболчиларда ҳам қандайдир жиҳатларни илғай олишади. Жумладан, Давинсон Санчес билан боғлиқ иш буни амалда тасдиқлайди. Чунки Европадаги бошқа топ-клублардан анча илдамроқ ҳаракат қилган амстердамлик скаутлар уни «Аякс»га олиб келиш масаласини ижобий ҳал эта олганлар.

4. Ҳаким Зиеш

Қайси клубдан сотиб олинган? 2016 йили «Твенте»дан 11 млн.еврога. Қайси жамоага трансфер қилиняпти? Жорий йил ёзида «Челси»га. Трансфер қиймати: 40 млн.евро.

Марокашлик иқтидор эгасини қўлга киритиш учун топ-5 лигалардаги бошқа етакчи клублар ҳам курашга қўшилгандилар. Лекин бу курашда омад «Челси»га кулиб боқди. Қолаверса, Ҳаким Зиешнинг ўзи ҳам «Аякс» билан ички майдондаги барча соврин ва унвонларни ютганидан сўнг омадини янада жиддийроқ клубда синаб кўриш ҳақида ўйлашга тушганди. Томонлар ўртасидаги келишувга мувофиқ ярим ҳимоячи жорий мавсумни «Лолалар юрти»да ниҳоясига етказади. Сўнг «Челси» мураббийлар штаби вакиллари ихтиёрида бўлиши керак. Африкалик юлдузнинг «Аякс»даги статистик натижалари ҳам жуда яхши кўринишда: 160 учрашув, 48 гол ва 82 та ассистентлик. Шу боис унинг трансфер қиймати 40 миллион еврога баҳоланганидан ажабланиш керак эмас.

5. Аркадиуш Милик

Қайси клубдан сотиб олинган? 2015 йили «Байер»дан 2,8 млн.еврога. Қайси жамоага трансфер қилинган? 2016 йили «Наполи»га. Трансфер қиймати: 32 млн.евро.

Польшалик ҳужумчи 18 ёшида «Байер»га келганди. Аммо немис клубидаги мураббийлар Миликдаги бор иқтидорни намоён эта олмаганлар. Шу боис леверкузенликлар уни ижара асосида ўйнаши учун «Аякс»га бериб юборишган. Буни қарангки, амстердамликлар жамоасида Аркадиуш жуда қобилиятли ўйинчи эканлигини исботлаб бера олган. Ўз навбатида «Аякс» мутасаддилари фурсатни бой бермай, польшалик футболчини 2,8 миллион еврога «доришунослар»дан сотиб олганлар. Айтишларича, Милик 2016 йил ёзида «Наполи»га 32 миллион еврога пулланган маҳалда нидерланд клуби мутасаддилари аламдан йиғлаб юбораёзганлар.

БИЛИБ ҚЎЙГАН ЯХШИ

* «Аякс» томонидан клуб таркибига қўшиб олинган энг қиммат футболчи Миралем Сулаймони ҳисобланади. Раҳбарият унинг трансфери учун 16,25 миллион евродан воз кечган. Айтиш керакки, Сулаймони ўзига билдирилган ишончни оқлай олмаган. Боз устига у «Аякс»ни эркин агент мақомида тарк этганди.

* Аркадиуш Милик, Давинсон Санчес, Френки де Йонг ва Ҳаким Зиешни сотиб олиш учун жами 28,93 миллион евро сарфланган. Уларнинг четга пулланишидан эса «Аякс» 274,5 миллион евро фойда кўрган!!!