Креспо "ЖЧ-2026" фаворитларини айтди ва Ямал ҳақида фикр билдирди

Аргентина терма жамоасининг собиқ ҳужумчиси Эрнан Креспо жаҳон чемпионатидаги асосий фаворитлар ҳақида фикр билдирди. Эслатиб ўтамиз, мусобақа 11 июндан 19 июлга қадар АҚШ, Канада ва Мексика майдонларида ўтмоқда.
 

Креспонинг таъкидлашича, ҳозирча учта терма жамоа бошқалардан очиқча ажралиб турибди.

«Аргентина, Франция ва Испания. Менимча, улар жамоавий тузилма ва ўйин услуби жиҳатидан бошқалардан бир қадам олдинда», – дея келтиради унинг сўзларини AS нашри.
 

Мутахассис Аргентина ва Испания плей-офф босқичида эрта тўқнаш келиши эҳтимолига ҳам тўхталди.

«Футбол учун афсусли ҳолат бўлади, агар бу жамоалардан бири мусобақани бунчалик эрта тарк этса. Улар финалга яқинроқ босқичларда учрашгани маъқул эди», – деди у.
 

Испания терма жамоаси ҳақида гапирар экан, Креспо айниқса унинг ўйин услубига алоҳида эътибор қаратди.
 

«Испания – номлардан кўра, ўйин услуби ва идентичлиги устувор бўлишининг ёрқин намунаси. Улар ажойиб ёш авлодга эга, тўпни назорат қилишдаги жасоратлари менга жуда ёқади. Евро ва Миллатлар лигасида кўрсатган ўйинлари тасодиф эмас. Улар ўз услубини сақлаб қолди, бироқ ўйини янада тик йўналишда, ҳужумкорроқ бўлди, прессингда агрессивроқ ҳаракат қиляпти ва бўш зоналарга ҳужум қилишни анча яхшилади. Бу жуда мукаммал шаклланган жамоа», – дея таъкидлади Креспо.

Испания термасининг ёш юлдузи Ламин Ямал ҳам алоҳида эътирофга лойиқ.
 

«Биз 20 йилда бир марта дунёга келадиган футболчи ҳақида гапиряпмиз. У бу ёшда қилаётган ишлари одатий меъёрдан анча юқори. Агар у камтарлигини сақлаб қолса ва ўйиндан завқ олишда давом этса, келаси 10 йилда жаҳон футболида устунлик қилиши мумкин. Бу футболни яхши кўрадиган ҳар бир инсон учун ҳақиқий совға», – деди аргентиналик мутахассис.
 

Аввалроқ Ламин Ямал тўлиқ равишда жароҳатдан тиклангани ва мусобақанинг биринчи турида Кабо-Вердега қарши учрашувда майдонга тушиши мумкинлиги маълум қилинган эди.